ՀՖՖ-ն 5 տարվա պայմանագիր է կնքել Instat-ի հետ

20:46   13 մարտի, 2019

Հայաստանի ֆուտբոլի ֆեդերացիայի և Instat Limited ընկերության միջև կնքված նոր՝ 5-ամյա պայմանագրով նախատեսվում է տեխնիկա-տակտիկական գործողությունների վերաբերյալ ընդգրկուն ինֆորմացիայի տրամադրում Հայաստանի ազգային և բոլոր տարիքային հավաքականների (այդ թվում՝ ֆուտզալի և կանանց ազգային հավաքականների) մարզչական շտաբերին, փոխանցում է ՀՖՖ կայքը:

Ազգային հավաքականի մարզչական շտաբը կստանա ֆուտբոլիստների՝ խաղերի ժամանակ կատարած ֆիզիկական աշխատանքի վերաբերյալ ամբողջական պատկեր։ Ազգային հավաքականի խաղերն այսուհետ կնկարահանվեն նաև autocrop համակարգով, որը հնարավորություն է ընձեռում ստանալ դաշտում ծավալվող իրադարձությունների ամբողջական պատկեր:

Ամբողջական վերլուծության կենթարկվեն նաև ՀՖՖ կողմից անցկացվող բոլոր պրոֆեսիոնալ մրցաշարերի (Բարձրագույն խումբ, Առաջին խումբ, Հայաստանի Գավաթ, Հայաստանի Սուպերգավաթ) բոլոր հանդիպումները։ ՀՖՖ կողմից Հայաստանի Բարձրագույն և Առաջին խմբերի մասնակից բոլոր ակումբների համար ձեռք են բերվել Instatscout համակարգի անձնական հաշիվներ, որոնց միջոցով ակումբների մարզիչները հնարավորություն կունենան ավելի պրոֆեսիոնալ կերպով վերլուծելու իրենց թիմերի և մրցակիցների ելույթները, ֆուտբոլիստների առաջադիմությունը և այլն։

ՀՖՖ պաշտոնական կայքում շուտով կտեղադրվի ՀՀ Բարձրագույն խմբի, Գավաթի և Սուպերգավաթի խաղարկությունների «վիճակագրական բազան», որը մեր կայքի այցելուներին հասանելի կդարձնի վերոնշյալ մրցաշարերի բոլոր հանդիպումների մասին ընդգրկուն վիճակագրական ինֆորմացիա թե՛ ակումբների և թե՛ առանձին ֆուտբոլիստների ելույթների հետ կապված։

Instat Limited-ի կողմից վերլուծության կենթարկվեն նաև ՀՀ Բարձրագույն խմբի առաջնության հանդիպումները սպասարկող մրցավարների գործողությունները, ինչը կնպաստի մրցավարության որակի բարձրացմանը։



© 2020 NEWS.am - Sport

Սույն կայքում տեղ գտած լրատվական հրապարակումների հեղինակային իրավունքը պատկանում է բացառապես NEWS.am լրատվական-վերլուծական գործակալությանը։Սույն կայքի բոլոր լրատվական հրապարակումները անհատական օգտագործման համար են։ Տեղեկատվություն տարածող այլ միջոցներում սույն կայքի հրապարակումների (մասնակի կամ ամբողջական) վերահրապարկման համար անհրաժեշտ է NEWS.am լրատվական-վերլուծական գործակալության գրավոր թույլտվությունը։Խախտում թույլ տված անձինք կենթարկվեն պատասխանատվության օրենքով սահմանված կարգով։