Հայ շախմատիստների մասնակցությամբ Aeroflot Open-ի առաջին տուրը դադարեցվել է կեղծ ահազանգի պատճառով

14:03   20 փետրվարի, 2019

Մոսկվայի «Կոսմոս» հյուրանոցում փետրվարի 19-ին մեկնարկած Aeroflot Open շախմատային ամենամյա մրցաշարի առաջին տուրն անավարտ է մնացել կեղծ ահազանգի պատճառով:

Առաջին տուրի մեկնարկից 45 րոպե անց պարտիաները դադարեցվել են, քանի որ ահազանգ էր ստացվել, որ «Կոսմոս» հյուրանոցն ականապատված է: Նմանատիպ ահազանգեր էին ստացվել, որ ականապատված է «Օստանկինո» հեռուստաաշտարակը, «Կազանյան» կայարանը եւ մի շարք այլ վայրեր:

Հայաստանի շախմատային ֆեդերացիայի մամուլի ծառայության հետ զրույցում շախմատի կանանց Հայաստանի հավաքականի առաջին համար Էլինա Դանիելյանը նշել է, որ սկզբում մասնակիցները կարծել են, թե դա ուսումնական ահազանգ է, սակայն րոպեներ անց եկել է հյուրանոցի տնօրենը եւ կարգադրել շտապ լքել շենքը: Մասնակիցներից ոմանք նույնիսկ հնարավորություն չեն ունեցել իրենց հետ վերցնել տաք հագուստ:

Դեպքի վայր ժամանած ոստիկանները, ՌԴ ՊՆ եւ ԱԻՆ աշխատակիցները մի քանի ժամ անց պարզել են, որ ահազանգը կեղծ է եղել:

Հիշեցնենք, որ Aeroflot Open-ի գլխավոր մրցաշարին մասնակցում են Հայաստանի 5 ներկայացուցիչներ՝ Հայկ Մարտիրոսյանը, Տիգրան Լ. Պետրոսյանը, Մանուէլ Պետրոսյանը, Արամ Հակոբյանը եւ Շանթ Սարգսյանը:

B մրցաշարում հանդես են գալիս գրոսմայստեր Ռաֆայել Վահանյանը, Էլինա Դանիելյանը, Տիգրան Հարությունյանը, Հովիկ Հայրապետյանը, Վահե Բաղդասարյանը եւ Արթուր Դավթյանը:

C մրցաշարում Հայաստանը ներկայացնում են Արթուր Ղարագյոզյանը, Աշոտ Ավետիսյանը, Հարություն Աբգարյանը եւ Գագիկ Ավետիսյանը:



© 2024 NEWS.am - Sport

Սույն կայքում տեղ գտած լրատվական հրապարակումների հեղինակային իրավունքը պատկանում է բացառապես NEWS.am լրատվական-վերլուծական գործակալությանը։Սույն կայքի բոլոր լրատվական հրապարակումները անհատական օգտագործման համար են։ Տեղեկատվություն տարածող այլ միջոցներում սույն կայքի հրապարակումների (մասնակի կամ ամբողջական) վերահրապարկման համար անհրաժեշտ է NEWS.am լրատվական-վերլուծական գործակալության գրավոր թույլտվությունը։Խախտում թույլ տված անձինք կենթարկվեն պատասխանատվության օրենքով սահմանված կարգով։