«Լեւանտեն» բողոք կներկայացնի «Բարսելոնայի» դեմ

«Լեւանտեն» Իսպանիայի ֆուտբոլի ֆեդերացիային բողոք կներկայացնի «Բարսելոնայի» դեմ: Այդ մասին հայտարարել է ակումբի նախագահ Կիկո Կատալանը:

Նախօրեին հայտնի էր դարձել, որ կատալոնական ակումբին որակազրկում է սպառնում Իսպանիայի գավաթի խաղարկությունում: «Լեւանտեի» դեմ 1/8 եզրափակիչի առաջին հանդիպմանը «Բարսելոնայի» կազմում մասնակցել է որակազրկված ֆուտբոլիստ: «Բարսելոնայի» երկրորդ թիմի խաղացող, իսպանացի պաշտպան Խուան Մովիլյան «Լեւանտեի» դեմ առաջին խաղում հանդես է եկել 58 րոպե: Նա որակազրկումը ստացել է երկրորդ թիմում ստացած դեղին քարտերի պատճառով եւ իրավունք չի ունեցել մասնակցել նաեւ գլխավոր թիմի հանդիպմանը:

«Իրավիճակը բարդ է: Մենք սպորտային աշխարհի ներկայացուցիչներ ենք եւ սիրում ենք հաղթանակի հասնել միայն ֆուտբոլային դաշտում, սակայն պատրաստվում ենք բողոք ներկայացնել Իսպանիայի ֆուտբոլի ֆեդերացիային»,- Կիկո Կատալանի խոսքը մեջբերում է Marca-ն:

Հիշեցնենք, որ առաջին խաղում «Բարսելոնան» «Լեւանտեին» պարտվել էր 1:2 հաշվով, իսկ պատասխան մրցավեճում խփեց 3 անպատասխան գոլ եւ դուրս եկավ քառորդ եզրափակիչ:

2015թ. դեկտեմբերին Մադրիդի «Ռեալը» որակազրկվել էր Իսպանիայի գավաթի խաղարկությունից կիսապաշտպան Դենիս Չերիշեւի մասնակցության համար: Նա դեղին քարտերի քանակի պատճառով էր որակազրկված եղել եւ իրավունք չէր ունեցել մասնակցել «Կադիսի» դեմ 1/16 եզրափակիչի առաջին հանդիպմանը (3:1):