Պրոֆեսիոնալ բռնցքամարտիկ Միշա Ալոյանը կպայքարի օլիմպիական ուղեգրի համար

Ռուսաստանցի պրոֆեսիոնալ բռնցքամարտիկ Միշա Ալոյանը մտադիր է մասնակցել Տոկիո-2020 Օլիմպիական խաղերի ընտրական փուլին: Այդ մասին հայտնել է 30-ամյա բռնցքամարտիկի մարզիչը՝ Էդուարդ Կրավցովը, գրում է «ТАСС»-ը:

Պրոֆեսիոնալ ռինգում Ալոյանը հաջորդ մենամարտը կանցկացնի ապրիլին Կեմերովոյում, իսկ դրանից հետո կպայքարի օլիմպիական վարկանիշների համար:

Միշա Ալոյանը աշխարհի կրկնակի չեմպիոն է, Եվրոպայի առաջնության ոսկե մեդալակիր ու Լոնդոն-2012 Օլիմպիական խաղերի բրոնզե մեդալակիր: Ռիո-2016 Օլիմպիական խաղերում նա դարձել էր փոխչեմպիոն, սակայն ավելի ուշ զրկվեց արծաթե մեդալից դոպինգ ընդունելու պատճառով: 2017-ին նա սկսել էր պրոֆեսիոնալ բռնցքամարտիկի կարիերա: Անցկացրած 5 մենամարտերից չորսում Միշան հաղթել է եւ միակ պարտությունը կրել հարավաֆրիկացի Զոլանի Տետեից: