Աբրահամ Խաշմանյան. Չեմպիոնության համար պայքարելու խնդիր է դրվելու

«Արարատի» գլխավոր մարզիչ Աբրահամ Խաշմանյանը խոսել է թիմի առաջիկա ծրագրերի եւ նպատակների մասին։

«Հունվարին մեկ շաբաթ նախապատրաստական մարզումներ կլինի, աստիճանական: Հունվարի 14-ից մինչև 21-ը կանցկացնենք առաջին հավաքը Ձորաղբյուրում` մեր մարզաբազայում, որտեղ պետք է լինեն այն բոլոր ֆուտբոլիստները, ովքեր մեզ հետ են լինելու ամբողջ տարվա ընթացքում: Անգամ այն լեգիոներները, որոնց հետ մենք կապ ենք հաստատել ու 99 տոկոսով պետք է միանան մեզ: Բոլորը թիմի հետ պետք է լինեն հենց առաջին հավաքից: Դա մեծ նշանակություն ունի:

Առաջին հավաքում խնդիրը դրվելու է բարձրացնել ֆուտբոլիստների ֆիզիկական վիճակը:Դրանից հետո կլինի կարճատև դադար, բայց չի նշանակում, որ խաղացողներին հանգիստ կտրվի, օրական մեկ մարզում կանցկացնենք, մինչև երկրորդ հավաքը:

Երկրորդ հավաքը նախատեսված է Սոչիում` հունվարի 24-ից փետրվարի 4-ը: Կլինենք Весна հյուրանոցում, որտեղ կա մեծ մարզաբազա: Այնտեղ նախատեսված է երկու ընկերական հանդիպում:

Այդ հավաքից հետո կլինի դադար, սակայն մարզումները շարունակվելու են: Այնուհետև կանցկացնենք երրորդ հավաքը: Կմեկնենք Կիպրոս փետրվարի 11-23-ը: Այնտեղ նույնպես ընկերական հանդիպումներ կլինեն:

Բնական է, որ չափից շատ ենք հետ մնացել մյուս թիմերից, չկանք նաև Գավաթի խաղարկությունում: Բուն խնդիրը` վեց ամսվա ընթացքում ամուր և հզոր թիմ ստեղծելն է, որը մեծ հարցեր կլուծի 2019/2020 մրցաշրջանում:

Անձամբ իմ կողմից խնդիր է դրվելու, պայքարել չեմպիոնության համար և բնական է խաղալ եվրագավաթներում: Այս խնդիրը լինելու է 2019/2020 մրցաշրջանում:

Այս վեց ամսվա ընթացքում պետք է կարողանանք ու վստահ եմ` կարող ենք ստեղծել շատ ուժեղ «Արարատ», որը կկատարի այդ խնդիրները»,– Խաշմանյանի խոսքը փոխանցում է ակումբի մամուլի ծառայությունը: