Նազիկ Ավդալյան. Սիմոն Մարտիրոսյանի տիտղոսը շատ սպասված ու մեծ հաղթանակ էր

11:23   10 նոյեմբերի, 2018

Սիմոն Մարտիրոսյանի աշխարհի չեմպիոնի տիտղոսը շատ սպասված ու մեծ հաղթանակ էր, քանի որ երկար ժամանակ ծանրամարտից աշխարհի չեմպիոն չէինք ունեցել:

Այս մասին NEWS.am Sport-ի թղթակցի հետ զրույցում ասաց 2009թ. աշխարհի չեմպիոն, Եվրոպայի կրկնակի չեմպիոն, Ռիո-2016 Օլիմպիական խաղերի ծանրամարտի կանանց 69 կգ քաշայինների պայքարում 5-րդ տեղ զբաղեցրած Նազիկ Ավդալյանը:

«Սիմոն Մարտիրոսյանն անբացատրելի մարզիկ է: Նա ամեն անգամ մրցահարթակում ապացուցում է իր լավագույնը լինելը: Սիմոնը փոքր տարիքից էլ աչքի էր ընկնում իր ուժող, հեռանկարային մարզիկ էր երեւում եւ մեծ ներուժ ուներ: Ես դեռ տարիներ առաջ նշել էի, որ ճիշտ մարզումների եւ աշխատանքի արդյունքում նա մեծ նվաճումների կհասնի: Սպասում էի նրանից այս հաղթանակը եւ որեւէ կասկած չկար, որ Սիմոն Մարտիրոսյանը դառնալու է անկախ Հայաստանի աշխարհի չեմպիոններից մեկը: Շնորհավորում եմ Սիմոնին, մեր ազգին: Սա մեծ ու շատ սպասված հաղթանակ էր, քանի որ երկար ժամանակ ծանրամարտից աշխարհի չեմպիոն չէինք ունեցել:

Ծանրամարտում եւ առհասարակ յուրաքանչյուր մարզաձեւում աշխարհի չեմպիոնի կոչումը նվաճելը շատ բարդ է: Մինչեւ այդ կոչմանն արժանանալը մարզիկները մի ամբողջ կյանք են դնում այդ ամենում: Հպարտանում եմ, որ հայկական սպորտն այսօրինակ զարգացում է ապրում, որ աշխարհի ուժեղագույնները մեր երկիրը ներկայացնող հայ մարզիկների հետ են պայքարի մեջ մտնում, իսկ մրցաշարերի վերջում Հայաստանի դրոշն է բարձրանում ու մեր հիմնը հնչում: Սա մեծ պատիվ է յուրաքանչյուր մարզիկի համար:

Հավատում եմ, որ Սիմոն Մարտիրոսյանը նույն տեմպով եւ ոգով աշխատանքը շարունակելու դեպքում օլիմպիական չեմպիոնի կոչումն էլ կնվաճի, իր այս նվաճումներն էլ կկրկնապատկի»,- ասաց Նազիկ Ավդալյանը:

Հիշեցնենք, որ 2010 թվականից հետո Հայաստանը ծանրամարտում աշխարհի չեմպիոն չէր ունեցել: 21-ամյա Սիմոն Մարտիրոսյանը չեմպիոնական տիտղոսը նվաճեց 109 կգ քաշային կարգում: Նա առաջին անգամ է հասնում այսպիսի հաջողության:

Լուսինե Շահբազյան



© 2024 NEWS.am - Sport

Սույն կայքում տեղ գտած լրատվական հրապարակումների հեղինակային իրավունքը պատկանում է բացառապես NEWS.am լրատվական-վերլուծական գործակալությանը։Սույն կայքի բոլոր լրատվական հրապարակումները անհատական օգտագործման համար են։ Տեղեկատվություն տարածող այլ միջոցներում սույն կայքի հրապարակումների (մասնակի կամ ամբողջական) վերահրապարկման համար անհրաժեշտ է NEWS.am լրատվական-վերլուծական գործակալության գրավոր թույլտվությունը։Խախտում թույլ տված անձինք կենթարկվեն պատասխանատվության օրենքով սահմանված կարգով։