«Սպորտինգի» ու «Լեւանտեի» ֆուտբոլիստները՝ Հայաստանի հավաքականից կրած պարտության մասին

Լիսաբոնի «Սպորտինգի» պաշտպան Ստեֆան Ռիստովսկին ու իսպանական «Լեւանտեի» կիսապաշտպան Էնիս Բարդին Մակեդոնիայի հավաքականի կազմում Ազգերի լիգայի չորրորդ տուրում Հայաստանի թիմին պարտվելուց հետո դժգոհել են մրցավարությունից: Հանդիպումը սպասարկել էր Շվեդիայի մրցավարական անձնակազմը՝ 41-ամյա Մարտին Ստրյոմբերգսոնի գլխավորությամբ:

«Իմ նկատմամբ խախտումից հետո կար ակնհայտ 11 մետրանոց հարված, եւ դա տեսան բոլորը՝ բացի մրցավարից: Ես, իսկապես, չեմ հասկանում, թե ինչպես կարելի էր կայացնել այդպիսի որոշում: Մրցակիցը չդիպավ գնդակին եւ հարվածեց ոտքիս: Եթե մենք իրացնեինք 11 մետրանոց հարված, դա կփոխեր խաղի ընթացքը: Ամեն դեպքում, ճանապարհ դեպի հետ չկա: Պետք մոռանանք այս տհաճ դրվագն ու մինչեւ վերջ պայքարենք խմբում առաջին տեղ գրավելու համար»,- ասել է Էնիս Բարդին:

«Վաղը ոչ մեկ չի հիշելու, որ Մակեդոնիայի հավաքականը տուժել է մրցավարական գործողություններից: Բոլորը կնշեն, որ մակեդոնացիները ջախջախիչ պարտություն կրեցին 0:4 հաշվով: Եթե վերլուծենք խաղը, ապա կարող եմ ասել, որ այս մրցավարի հետ այստեղ չէր կարող հաղթել նույնիսկ Իսպանիայի հավաքականը: Բարդ է, երբ հաղթական շարքից հետո պարտվում ես 0:4 հաշվով: Ցուցադրեցինք անհաջող խաղ: Պետք է պատրաստ լինենք նաեւ այսպիսի խաղերի ու այսպիսի մրցավարների, այդպիսին են իսկական հաղթողները»,- նշել է Ստեֆան Ռիստովսկին, փոխանցում է ekipa.mk-ն:

Այդ հանդիպման մրցավարությունից բողոքել էր նաեւ Մակեդոնիայի հավաքականի ավագ, իտալական «Ջենոայի» հարձակվող Գորան Պանդեւը:

Հիշեցնենք, որ Երեւանի «Հանրապետական» ստադիոնում կայացած խաղում Հայաստանի հավաքականը խփել էր 4 անպատասխան գոլ՝ տանելով առաջին հաղթանակն Արմեն Գյուլբուդաղյանցի գլխավորությամբ: Այդ հաղթանակից հետո հայկական թիմը վաստակեց 6 միավոր եւ երկրորդն է D դիվիզիոնի չորրորդ խմբում: Խմբի առաջատար Մակեդոնիան ունի 9 միավոր: Ջիբրալթարն ունի 6 միավոր, իսկ Լիխտենշտեյնը՝ 3:

Հայաստանի եւ Մակեդոնիայի հավաքականիների միջեւ առաջին շրջանի խաղում մակեդոնացիները տնային հաղթանակ են տարել 2:0 հաշվով: Հոկտեմբերի 13-ին Հայաստանի հավաքականը Երեւանում նվազագույն հաշվով պարտվել էր Ջիբրալթարի հավաքականին, որն իր պատմության մեջ առաջին հաղթանակը տարավ պաշտոնական խաղերում:

Հայաստանի հավաքականն Ազգերի լիգայի խմբային փուլի վերջին 2 խաղերը կանցկացնի նոյեմբերի 16-ին ու 19-ին՝ հյուրընկալվելով Ջիբրալթարին ու Լիխտենշտեյին: