Ուսեյն Բոլթը դժգոհ է, որ իրենից պահանջել են դոպինգ թեստ հանձնել Ավստրալիայում (ֆոտո)

Օլիմպիական խաղերի ութակի չեմպիոն, 100 եւ 200 մետր վազքի աշխարհի ռեկորդակիր Ուսեյն Բոլթը զարմացած է, որ Ավստրալական հակադոպինգային գործակալությունը (ASADA) պահանջել է հանձնել դոպինգ թեստ: 2017-ին աթլետի կարիերան ավարտած 32-ամյա ջամայկացին սկսել է ֆուտբոլիստի կարիերա եւ վերջերս առաջին գոլերն էր խփել ավստրալական «Սենթրալ Քոսթ Մարիներս» ֆուտբոլային ակումբի կազմում:

«Ես հրաժեշտ եմ տվել աթլետիկային, որպեսզի դառնամ ֆուտբոլիստ: Ինչո՞ւ պետք է հանձնեմ դոպինգ թեստ: Ես դեռ պրոֆեսոինալ ֆուտբոլիստ չեմ: Ես հակադոպինգային գործակալության ներկայացուցիչին հարցրեցի, թե ինչու պետք է անցնեմ դոպինգ ստուգում, եթե դեռ պայմանագիր չեմ կնքել ակումբի հետ: Ինձ ասացին, որ պետք է անեմ դա, քանի որ բարձր մակարդակի մարզիկ եմ: Դե ինչ, լավ»,- Ինստագրամում գրել է Բոլթը:

Հիշեցնենք, որ հոկտեմբերի 12-ին կայացած «Մաքարտուր Վեստ Կոս Յունայթեդի» դեմ Ավստրալիայի առաջնության նախամրցաշրջանային խաղում ջամայկացի նախկին արագավազորդը դարձել էր դուբլի հեղինակ: 57-րդ րոպեին Բոլթն առաջին գոլն է խփել պրոֆեսիոնալ ֆուտբոլում, իսկ 11 րոպե անց աչքի է ընկել եւս մեկ անգամ: «Սենթրալ Քոսթ Մարիներսը» հաղթել է 4:0 հաշվով, իսկ նախկին աթլետն առաջին անգամ հանդես է եկել մեկնարկային կազմում: