Գլխուղեղի վիրահատությունից հետո առաջին անգամ «Օլդ Տրաֆորդ» եկած Ֆերգյուսոնին դիմավորել են բուռն ծափերով

«Մանչեսթեր Յունայթեդի» նախկին գլխավոր մարզիչ, 76-ամյա լեգենդար շոտլանդացի Ալեքս Ֆերգյուսոնին ջերմությամբ են ընդունել «Օլդ Տրաֆորդ» ստադիոնում «Մանչեսթեր Յունայթեդ» - «Վուլվերհեմփթոն» հանդիպման ժամանակ: Մայիսին Ֆերգյուսոնը գլխուղեղի արյունազեղումից հետո վիրահատվել էր եւ դրանից հետո առաջին անգամ էր եկել «Օլդ Տրաֆորդ»:

«Հուզված եմ, քանի որ ապրիլից ներկա չեմ եղել «Մանչեսթեր Յունայթեդի» հանդիպումներին: Հրաշալի է վերադառնալ ստադիոն այսքան բուժումներից եւ վերականգնողական փուլից հետո: Երկար ուղի էր, բայց որդուս եւ բժիշկների ցուցումներին հետեւելով՝ շարժվում եմ առաջ»,- Ֆերգյուսոնի խոսքը մեջբերում է skysports-ը:

«Ֆանտաստիկ նորություն է բոլորիս համար Ֆերգյուսոնի վերադարձը»,- ասել է մանչեսթերյան թիմի պորտուգալացի գլխավոր մարզիչ Ժոզե Մոուրինյոն:

Ֆերգյուսոնը վիրահատվել էր մայիսի 5-ին եւ գտնվում էր ծայրահեղ ծանր վիճակում: Մայիսի 7-ին նա դուրս էր եկել կոմայից եւ զրուցել իր հարազատների հետ:

Ալեքս Ֆերգյուսոնը «Մանչեսթեր Յունայթեդը» գլխավորել է 27 տարի (1986-2013-ը)՝ նվաճելով 38 տիտղոս: Նա 13 անգամ դարձել է Անգլիայի չեմպիոն եւ 2 անգամ հաղթել Չեմպիոնների լիգայում: 1999 թվականին շոտլանդացի մասնագետը ստացել է ասպետական կոչում:

Հիշեցնենք, որ «Մանչեսթեր Յունայթեդ» - «Վուլվերհեմփթոն» հանդիպումն ավարտվել է ոչ ոքի՝ 1:1: