Հենրիխ Մխիթարյանը՝ տուրի խորհրդանշական հավաքականում

Ֆուտբոլի Հայաստանի ազգային հավաքականի եւ Դոնեցկի «Շախտյորի» կիսապաշտպան Հենրիխ Մխիթարյանն ընդգրկվել է Ուկրաինայի առաջնության չորրորդ տուրի խորհրդանշական հավաքականում:

Ուկրաինական Football.ua կայքը, ամփոփելով չորրորդ տուրը, 23-ամյա Մխիթարյանի մասին գրել է հետեւյալը. «Երեւում է այս տղային կանգնեցնելն անհնար է: Մխիթարյանն ուղղակի ոչնչացրեց «Վոլինի» պաշտպանությունը՝ ծաղրելով ամեն անգամ: Հենրիխը երկու գոլ խփեց եւ մի քանի լավ գոլային պահեր ունեցավ»:

Հիշեցնենք, որ օգոստոսի 6-ին «Շախտյորը» մրցակցի խաղադաշտում չորս անպատասխան գնդակ ուղարկեց «Վոլինի» դարպասը: Մխիթարյանը դարձավ դուբլի հեղինակ՝ ճանաչվելով տուրի լավագույն ֆուտբոլիստ: