Ֆուտբոլի Իսպանիայի չեմպիոնի տիտղոսը ժամանակից շուտ ապահոված «Բարսելոնան» հաղթանակով ավարտեց առաջնությունը: Պրիմերայի վերջին՝ 38-րդ տուրի վերջին խաղում կատալոնական ակումբը սեփական դաշտում նվազագույն հաշվով առավելության հասավ «Ռեալ Սոսյեդադի» նկատմամբ: Միակ գոլն անկրկնելի հարվածով երկրորդ խաղակեսում խփեց բրազիլացի կիսապաշտպան Ֆելիպե Կոուտինյոն (տեսանյութ):
«Բարսելոնայում» վերջին հանդիպումն անցկացրեց իսպանացի կիսապաշտպան Անդրես Ինյեստան, որը մեկնարկային կազմում հանդես եկավ 82 րոպե: 33-ամյա ֆուտբոլիստը խաղադաշտից հեռացավ հոտնկայս ծափահարությունների ներքո: Ամբողջ կարիերան «Բարսելոնայում» անցկացրած Ինյեստան այս մրցաշրջանի վերջում տեղափոխվելու է Ճապոնիա կամ Չինաստան:
A legend departs and his legacy begins#infinit8iniesta pic.twitter.com/AEpefaJQVv
— FC Barcelona (@FCBarcelona) 20 мая 2018 г.
«Բարսելոնան» առաջնությունն ավարտեց 93 միավորով եւ 14 միավոր գերազանցեց երկրորդ տեղը գրաված Մադրիդի «Աթլետիկոյին»: Մադրիդի «Ռեալը» երրորդ տեղը գրավեց 76 միավորով: «Բարսելոնայի», «Աթլետիկոյի» ու «Ռեալի» պես Չեմպիոնների լիգայի ուղեգիր նվաճեց նաեւ չորրորդ տեղում հայտնված «Վալենսիան», որը հավաքեց 73 միավոր:
«Վիլյառեալը», «Բետիսն» ու «Սեւիլիան» նվաճեցին Եվրոպայի լիգայի ուղեգիր, իսկ «Դեպորտիվոն», «Լաս Պալմասն» ու «Մալագան» լքեցին Պրիմերան:
Հիշեցնենք, որ «Բարսելոնան» Իսպանիայի այս առաջնությունում միակ պարտությունը նախորդ տուրում կրել էր «Լեւանտեից» (4:5): Մինչեւ այդ հանդիպումը կատալոնական ակումբը Պրիմերայում գրանցել էր ռեկորդային անպարտելի շարք՝ չպարտվելով 43 խաղ անընդմեջ:
Իսպանիայի առաջնություն, 38-րդ տուր
«Բարսելոնա» - «Ռեալ Սոսյեդադ»՝ 1:0
Ֆելիպե Կուոտինյո, 57
Սույն կայքում տեղ գտած լրատվական հրապարակումների հեղինակային իրավունքը պատկանում է բացառապես NEWS.am լրատվական-վերլուծական գործակալությանը։Սույն կայքի բոլոր լրատվական հրապարակումները անհատական օգտագործման համար են։ Տեղեկատվություն տարածող այլ միջոցներում սույն կայքի հրապարակումների (մասնակի կամ ամբողջական) վերահրապարկման համար անհրաժեշտ է NEWS.am լրատվական-վերլուծական գործակալության գրավոր թույլտվությունը։Խախտում թույլ տված անձինք կենթարկվեն պատասխանատվության օրենքով սահմանված կարգով։