Ալեքս Ֆերգյուսոն. Արսեն Վենգերը լավագույն մարզիչներից մեկն է Պրեմյեր լիգայի պատմության մեջ

Հպարտ եմ, որ եղել եմ այդպիսի երեւելի մարդու մրցակիցը, գործընկերն ու ընկերը, ասել է «Մանչեսթեր Յունայթեդի» նախկին գլխավոր մարզիչ, շոտլանդացի Ալեքս Ֆերգյուսոնը Լոնդոնի «Արսենալի» ֆրանսիացի գլխավոր մարզիչ Արսեն Վենգերի մասին, որը հայտարարել է մրցաշրջանի ավարտից հետո պաշտոնից հեռանալու մասին։ Նրա պայմանագիրն անգլիական ակումբի հետ նախատեսված էր մինչեւ 2019 թվականը։

«Ես շատ երջանիկ եմ Վենգերի համար։ Հարգում եմ նրան եւ նրա աշխատանքը «Արսենալում»։ Նա ակումբին նվիրել է 22 տարի, ինչը նրա տաղանդի, պրոֆեսիոնալիզմի եւ նպատակասլացության վկայությունն է։ Անկասկած, նա լավագույն մարզիչներից մեկն է Պրեմյեր լիգայի պատմության մեջ»,– Ֆերգյուսոնի խոսքը մեջբերում է «Մանչեսթեր Յունայթեդի» մամուլի ծառայությունը։

Հիշեցնենք, որ 68-ամյա Վենգերը 1996 թվականից է գլխավորում «Արսենալը», որի հետ նվաճել է 17 տիտղոս՝ դառնալով Անգլիայի եռակի չեմպիոն (1997/98, 2001/02, 2003/04 մրցաշրջաններում)։ Նրան է պատկանում Պրեմյեր լիգայում անցկացրած խաղերի ռեկորդը (823 հանդիպում):

Անգլիայի ընթացիկ առաջնության ավարտից 5 խաղ առաջ լոնդոնյան ակումբը 54 միավորով 6-րդ տեղում է, իսկ Եվրոպայի լիգայում դուրս է եկել կիսաեզրափակիչ, որտեղ կմրցի Մադրիդի «Աթլետիկոյի» հետ: