Հայաստանի հավաքականի պաշտպան Վարազդատ Հարոյանն «Ուրալի» մեկնարկային կազմում հանդես եկավ առանց փոխարինման:
NEWS.am Sport-ի թղթակցի հետ զրույցում 25-ամյա ֆուտբոլիստը պատմեց կարևոր հաղթանակի և Հայաստանի ազգային թիմի հետ կապված ծրագրերի մասին:
Ռուսաստանի Պրեմյեր լիգայի 26-րդ տուրում «Ուրալը» հաղթեց երկրորդ տեղում ընթացող «Սպարտակին», իսկ դու 90 րոպե անցկացրիր խաղադաշտում: Ինչպե՞ս կմեկնաբանես հանդիպումը:
Շատ ծանր խաղ ստացվեց: «Սպարտակը» մեծ ուժերով գրոհում էր, սակայն մենք կարողացանք վստահ պաշտպանվել, օգտագործել մեր հնարավորությունները և մեզ համար շատ կարևոր 3 միավոր վաստակել:
Խաղից հետո քեզ գովեց նաև «Ուրալի» գլխավոր մարզիչ Ալեքսանդր Տարխանովը: Արդյո՞ք դա հետագա հաջող մրցելույթների համար լրացուցիչ խթան կլինի:
Միշտ հաճելի է մարզիչից լավ խոսքեր լսել` առավել ևս այսպիսի կարևոր խաղերից հետո: Ամեն ինչ անում եմ մարզիչի վստահությունը արդարացնելու և թիմիս օգուտ տալու համար:
Օրերս հավաքականի ղեկը կրկին ստանձնեց Վարդան Մինասյանը: Ի՞նչ ակնկալիքներ և ծրագրեր ունես` ազգային թիմի հետ կապված:
Առջևում երկու ընկերական հանդիպումներ ունենք, որոնք պետք է բարձր մակարդակով անցկացնենք` նախապատրաստվելով մեզ համար շատ կարևոր մրցաշարի` Ազգերի լիգային:
Վարդան Մինասյանի հետ համատեղ աշխատանքից բոլորիս մոտ միայն լավ հուշեր են մնացել: Հուսով եմ, որ կրկին մեծ հաղթանակներ կտանենք:
Սամվել Սուքիասյան
Սույն կայքում տեղ գտած լրատվական հրապարակումների հեղինակային իրավունքը պատկանում է բացառապես NEWS.am լրատվական-վերլուծական գործակալությանը։Սույն կայքի բոլոր լրատվական հրապարակումները անհատական օգտագործման համար են։ Տեղեկատվություն տարածող այլ միջոցներում սույն կայքի հրապարակումների (մասնակի կամ ամբողջական) վերահրապարկման համար անհրաժեշտ է NEWS.am լրատվական-վերլուծական գործակալության գրավոր թույլտվությունը։Խախտում թույլ տված անձինք կենթարկվեն պատասխանատվության օրենքով սահմանված կարգով։