Բուֆոնը՝ մրցավարին. Եթե դու չունես այդքան տղամարդկություն, նստիր տրիբունայում
12:20 12 ապրիլի, 2018Թուրինի «Յուվենտուսի» իտալացի դարպասապահ Ջանլուիջի Բուֆոնը մեկնաբանել է Չեմպիոնների լիգայի քառորդ եզրափակիչի պատասխան խաղում Մադրիդի «Ռեալի» նկատմամբ 3:1 հաշվով հաղթանակը: Ավելացված ժամանակում 40-ամյա Բուֆոնը կարմիր քարտ էր ստացել հանդիպման գլխավոր մրցավար Մայքլ Օլիվերի հետ վիճելու համար, իսկ «Ռեալի» պորտուգալացի հարձակվող Կրիշտիանու Ռոնալդուն 11 մետրանոցից խփել էր մադրիդցիների համար հաղթական գոլն այդ դիմակայությունում:
«Դա նույնիսկ 10 տոկոսով 11 մետրանոց չէր: Ես չգիտեմ, որ մրցավարը տեսավ այդ դրվագը: 93-րդ րոպեին չի կարելի նշանակել կասկածելի 11 մետրանոց, քանի որ առաջին խաղակեսում մեր օգտին պետք է նշանակվեր ակնհայտ 11 մետրանոց:
Թիմը ներդրեց ամբողջ ուժը, եւ մեկ մարդը չի կարող կասկածելի դրվագով հենց այնպես վերցնել ու կոտրել անհավանական «քամբեքի» երազանքը: Դրա համար քո սրտի փոխարեն պետք է լինի աղբաման: Բացի այդ, եթե դու տղամարդկություն չունես դաշտ դուրս գալ այսպիսի խաղում, ապա կնոջդ ու երեխաներիդ հետ նստիր տրիբունայում: Չի կարելի կործանել թիմի երազանքը:
«Ռեալն» արժանի էր 2 խաղերի արդյունքում նվաճել կիսաեզրափակիչի ուղեգիր: Ես հաջողություն եմ մաղթում նրանց: Ինձ համար միշտ պատիվ է խաղալ այդ թիմի դեմ, սակայն մենք նվազագույնն արժանի էինք լրացուցիչ ժամանակում խաղալուն»,- Բուֆոնի խոսքը մեջբերում է Gazzetta dello Sport-ը:
Հիշեցնենք, որ առաջին խաղում Արքայական ակումբն ուժեղ էր գտնվել 3:0 հաշվով, իսկ Մադրիդում կայացած պատասխան խաղում «Յուվենտուսը» հաղթեց 3:1 հաշվով եւ լքեց պայքարը: Ռոնալդուն Իտալիայի չեմպիոնի դարպասը գրավեց ավելացված ժամանակի 7-րդ րոպեին, երբ հյուրերի դարպասը պաշտպանում էր փոխարինման դուրս եկած լեհ դարպասապահ Վոյցեխ Շչեսնին:
Չեմպիոնների լիգայում Ջանլուիջի Բուֆոնն առաջին անգամ ստացավ կարմիր քարտ:
© 2026 NEWS.am - Sport
The copyright for information published on this web site is owned exclusively by Armenian News-NEWS.am information-analytical agency. All information materials published on this website are intended solely for personal use. For full or partial reproduction of any material in other media it is required to acquire written permission from Armenian News-NEWS.am information-analytical agency. Those, who have committed copyright violations, will be prosecuted accordingly.