Իսկոն չգիտի՝ ինչպես արժանանալ «Ռեալի» մեկնարկային կազմում մշտական տեղ ունենալուն
12:41 28 մարտի, 2018Իսպանիայի հավաքականի եւ Մադրիդի «Ռեալի» կիսապաշտպան Իսկոն ընկերական խաղում աշխարհի փոխչեմպիոն Արգենտինայի նկատմամբ 6։1 հաշվով հաղթանակից հետո խոսել է ակումբային գործերի մասին։ Դա 25-ամյա ֆուտբոլիստի առաջին հեթ-տրիկն էր կարիերայում։
«Դա ճիշտ է, որ «Ռեալում» չունեմ մշտական տեղ մեկնարկային կազմում։ Հնարավոր է, որ խնդիրն այն է, որ ես չգիտեմ, թե ինչպես արժանանամ դրան։
Ցանկանում եմ շարունակել աշխատանքը՝ չնայած նրան, որ առաջատար չեմ ակումբում։ Իսպանիայի հավաքականում ունեմ մարզիչի կողմից վստահություն։
Չնայած արդյունքին՝ Արգենտինայի հավաքականի դեմ խաղը հեշտ չէր։ Եկեք չմոռանանք, որ դա նախապատրաստական հանդիպում էր, պետք է լինել ավելի համեստ»,- Իսկոյի խոսքը մեջբերում է Goal.com-ը։
2003-ից հետո Իսկոն «Ռեալի» առաջին ֆուտբոլիստն է, որը հեթ-տրիկի հեղինակ է դառնում Իսպանիայի հավաքականում։ 2003-ին դա հաջողվել էր Ֆերնանդո Մորյենտեսին։
Հիշեցնենք, որ Մադրիդի «Վանդա Մետրոպոլիտանո» ստադիոնում կայացած հանդիպմանը «Բարսելոնայի» արգենտինացի հարձակվող Լիոնել Մեսին չէր մասնակցել ծնկի վնասվածքի պատճառով։ Արգենտինայի հավաքականը պատմության մեջ երրորդ անգամ պարտվել էր 1։6 հաշվով եւ 5-րդ անգամ՝ 5 գոլի տարբերությամբ։ 1958-ին արգենտինացիներին նույն հաշվով հաղթել էր Չեխոսլովակիան, իսկ 2009-ին՝ Բոլիվիան։
© 2026 NEWS.am - Sport
The copyright for information published on this web site is owned exclusively by Armenian News-NEWS.am information-analytical agency. All information materials published on this website are intended solely for personal use. For full or partial reproduction of any material in other media it is required to acquire written permission from Armenian News-NEWS.am information-analytical agency. Those, who have committed copyright violations, will be prosecuted accordingly.