Ֆուտբոլի Հայաստանի հավաքականի գլխավոր մարզիչ Արթուր Պետրոսյանին մեկնաբանել է թիմի խաղը էստոնացիների հետ ընկերական խաղում:
«Հանդիպումը ծառայեց իր նպատակին: Գոհ եմ տղաների նվիրվածությունից ու կատարած աշխատանքից: Գոհացրեց պաշտպանությունում խաղը, սակայն կարող ենք ավելի լավ խաղալ: Առաջին խաղակեսում ավելի հարձակողական ոճով խաղացինք, իսկ երկրորդում խաղադաշտ դուրս բերեցինք երկրորդ հենակետային կիսապաշտպանի: Կաղում էինք վերջին փոխանցման հարցում:
Գոհ եմ դարպասապահ Արամ Հայրապետյանի խաղից, սակայն ունենք ևս երկու հավասարազոր դարպասապահներ` Արսեն Բեգլարյանը և Գոռ Մանուկյանը: Հուսով եմ, որ կլուծվի նաև Դավիթ Յուրչենկոյի հարցը:
Վերջին մեկ ամսվա ընթացքում Նորբերտո Բրիասկոն զուրկ էր խաղային պրակտիկայից վնասվածքի պատճառով: Բալեկյանը լավ որակներով օժտված ֆուտբոլիստ է, շատ լավ մերվեց թիմին, սակայն նրան ժամանակ է պետք:
Մշտապես աշխատում ենք նոր ֆուտբոլիստներ հայտնաբերելու ուղղությամբ: Հնարավոր է, որ ապագայում էլ հավաքականում նորեկներ լինեն:
Մարզմանը վնասվածք ստացած Արաս Օզբիլիսի վիճակն ավելի լավ է, հնարավոր է, որ նա կմասնակցի Լիտվայի հետ խաղին»,- ասել է Արթուր Պետրոսյանը:
Հիշեցնենք, որ Հայաստան – Էստոնիա հանդիպում ավարտվել է 0:0 հաշվով: Մարտի 27-ին Հայաստանի թիմը կընդունի Լիտվայի հավաքականին, որն այսօր 0:4 հաշվով պարտվել է վրացիներին:
Սամվել Սուքիասյան
Ֆոտո՝ Արսեն Սարգսյան
Սույն կայքում տեղ գտած լրատվական հրապարակումների հեղինակային իրավունքը պատկանում է բացառապես NEWS.am լրատվական-վերլուծական գործակալությանը։Սույն կայքի բոլոր լրատվական հրապարակումները անհատական օգտագործման համար են։ Տեղեկատվություն տարածող այլ միջոցներում սույն կայքի հրապարակումների (մասնակի կամ ամբողջական) վերահրապարկման համար անհրաժեշտ է NEWS.am լրատվական-վերլուծական գործակալության գրավոր թույլտվությունը։Խախտում թույլ տված անձինք կենթարկվեն պատասխանատվության օրենքով սահմանված կարգով։