Չեմպիոնների լիգա. «Բարսելոնան» ոչ մի շանս չտվեց «Չելսիին»

Չեմպիոնների լիգայի 1/8 եզրափակիչի պատասխան խաղում իսպանական Պրիմերայի առաջատար «Բարսելոնան» ընդունեց Անգլիայի չեմպիոն Լոնդոնի «Չելսիին» եւ հաղթանակ տարավ 3:0 հաշվով:

Հաշիվն արդեն երրորդ րոպեին բացեց արգենտինացի հարձակվող Լիոնել Մեսին, որին գոլային փոխանցում կատարեց ուրուգվայցի հարձակվող Լուիս Սուարեսը: 20-րդ րոպեին Մեսիի փոխանցումից հետո աչքի ընկավ ֆրանսիացի հարձակվող Ուսման Դեմբելեն: Ընդմիջումից հետո դուբլ ձեւակերպեց Մեսին: Դարձյալ գոլային փոխանցման հեղինակը Սուարեսն էր:

Մեսին Ռոնալդուից հետո դարձավ երկրորդ ֆուտբոլիստը, որը Չեմպիոնների լիգայում խփում է 100 գոլ: Արգենտինացին այդ ցուցանիշին հասել է 123 խաղում, Ռոնալդուն՝ 137 խաղում:

Լոնդոնում տեղի ունեցած առաջին խաղում գրանցվել էր ոչ ոքի՝ 1:1:

Չեմպիոնների լիգա, 1/8 եզրափակիչ, պատասխան խաղ

«Բարսելոնա» (Իսպանիա) - «Չելսի» (Անգլիա)՝ 3:0 (առաջին խաղ՝ 1:1)

Լիոնել Մեսի, 3, 63, Ուսման Դեմբելե, 20