Կարամբյո. Հույս ունեմ, որ մի օր էլ Մխիթարյանն աշխարհի գավաթը կբերի Հայաստան
17:22 7 փետրվարի, 2018Հույս ունեմ, որ այս աշխարհի գավաթը մի օր կժամանի նաեւ Հայաստան եւ Մխիթարյանը, Ղազարյանը, Հայաստանի ազգային հավաքականը հնարավորություն կունենան այն ներկայացնել ձեզ:
Այս մասին ասել է Ֆրանսիայի հավաքականի կազմում 1998 թվականի աշխարհի չեմպիոն Քրիստիան Կարամբյոն Երեւանում ֆուտբոլի աշխարհի առաջնության գավաթը ներկայացնելիս:
«Շատ ուրախ եմ գտնվել Հայաստանում: Երբ Ֆրանսիայի հավաքականի կազմում նվաճեցինք աշխարհի չեմպիոնի տիտղոսը, այդ ժամանակ մեր թիմում ունեինք երկու հայ խաղացող` Ալեն Բոգոսյանը եւ Յուրի Ջորկաեֆը: Գավաթը նվաճելը, գլխավերեւում պահելը յուրաքանչյուր երկրի հավաքականի գլխավոր նպատակն ու երազանքն է: Եվ ես հույս ունեմ, որ մեկ օր Մխիթարյանին, Ղազարյանին կհաջողվի այս գավաթը բերել նաեւ Հայաստան, պահել իրենց ձեռքերում»,- ասաց Քրիստիան Կարամբյոն:
Մամուլի ասուլիսից հետո Գավաթի կազմակերպվեց նաեւ հանրային ցուցադրությունը Ազատության հրապարակում, որտեղ արդեն հավաքված էին մոտ 200 ֆուտբոլասերներ:
Գավաթը Ազատության հրապարակ դուրս բերեց Քրիստիան Կարամբյոն, ով հավաքվածներին ողջունեց հայերեն` «Բարի օր, Երեւան»: Աշխարհի չեմպիոնը գավաթը ձեռքին շրջեց հրապարակում, հետո այն տեղադրվեց պատվանդանի վրա եւ հավաքվածներին հնարավորություն տրվեց մի քանի մետր հեռավորությունից սելֆի անել գավաթի ֆոնին:
Հանրային ցուցադրությունը տեւեց շուրջ մեկ ժամ, որից հետո փակ միջոցառման ժամանակ աշխարհի գավաթը Քրիստիան Կարամբյոյից կընդունի ՀՀ նախագահ Սերժ Սարգսյանը:
Լուսինե Շահբազյան
© 2026 NEWS.am - Sport
The copyright for information published on this web site is owned exclusively by Armenian News-NEWS.am information-analytical agency. All information materials published on this website are intended solely for personal use. For full or partial reproduction of any material in other media it is required to acquire written permission from Armenian News-NEWS.am information-analytical agency. Those, who have committed copyright violations, will be prosecuted accordingly.