Հայաստանի ձյուդոյի ֆեդերացիայի փոխնախագահ. Մեր մարզիկները պատրաստ չէին տակտիկապես

Լոնդոնի Օլիմպիական խաղերում Հայաստանի մարզիկներից  առաջինը պայքարի մեջ մտան ձյուդոիստներ 60 կգ քաշային Հովհաննես Դավթյանն ու 66 կգ քաշային Արմեն Նազարյանը: Դավթյանը, հաղթանակ տանելով առաջին երեք գոտեմարտերում,  հետագայում երկու պարտություն կրեց եւ դուրս մնաց մեդալների համար պայքարից, իսկ Արմեն Նազարյանը պարտվեց իր երկրորդ գոտեմարտում եւ նույնպես  դուրս մնաց հետագա պայքարից:

NEWS.am Sport-ի թղթակցի հետ զրույցում Հովհաննես Դավթյանի եւ Արմեն Նազարյանի ելույթները մեկնաբանեց ձյուդոյի Հայաստանի ձյուդոյի ֆեդերացիայի փոխնախագահ եւ միջազգային կարգի մրցավար Դավիթ Խիթարյանը:

Պարոն Խիթարյան, ի՞նչ գնահատական կտաք մեր ձյուդոիստների ելույթներին:

Անկեղծ ասած՝ մենք մեդալներ ակնկալում էինք, ընդ որում մեր երկու մարզիկներից էլ:  Ճիշտ է, նախաօլիմպիական վերջին տարին մեր տղաների համար հաջող չընթացավ, քանի որ Մեծ սաղավարտի, Գրան պրի մրցումների ընթացքում մերոնք մեդալ չնվաճեցին: Բայց Եվրոպայի առաջնությունը հուսադրեց, քանի որ Հովհաննես Դավթյանը դարձավ արծաթե մեդալակիր, իսկ Արմեն Նազարյանն էլ պարտվեց նկատողությունների պատճառով: Մենք ենթադրում էինք, որ վրիպումները կշտկվեն, քանի որ դրա համար ժամանակ կար: Ցավոք, Օլիմպիական խաղերում երկու ձյոդոիստներն էլ պարտվեցին եւ երկուսն էլ նկատողությունների պատճառով: Իմ կարծիքով, դա մեր մարզիկների տակտիկական ոչ ճիշտ պատրաստվածության արդյունք էր:

Հովհաննես Դավթյանը իր քաշային կարգում ֆավորիտ էր համարվում ու երեք անընդմեջ հաղթանակ տարավ: Ի՞նչը խանգարեց մեր մարզիկին շարունակություն տալ հաղթանակներին:

Կարելի է մի քանի հանգամանքներ նշել: Առաջինն այն է, որ Հովհաննես Դավթյանը առաջին երեք գոտեմարտերում շատ ուժեղ ձյուդոիստների հետ էր մրցել, քան իտալացի մարզիկը, ում պարտվեց քառորդ եզրափակիչում: Մասնավորապես, երկրորդ գոտեմարտում Դավթյանը հաղթանակի հասավ մրցումների հաղթողի հիմնական հավակնորդներից մեկի՝ ադրբեջանցի Մուշկիեւի նկատմամբ ու հետո հաղթեց ղազախ Կոսաեւին: Իտալացու հետ գոտեմարտի առաջին մասում առավելությունը մեր մարզիկի կողմն էր, իսկ հետո Դավթյանը մի փոքր պասիվացավ ու եկու նկատողություն ստանալով պարտվեց: Ցավոք, մրցավարությունն էլ կարելի է ասել կողմնակալություն դրսեւորեց: Սփոփիչ գոտեմարտի ժամանակ Դավթյանի գցումը նախ գնահատվեց, ապա մեր մարզիկից միավորը հանվեց: Ճիշտն ասած մրցումների ընթացքում ես շատ տեսա, որ նման հնարքները չեն գնահատվում, բայց տեսա նաեւ հակառակը: Ինձ թվում է, մեր մարզիկի «յուկոն»  կար: Բացի այդ էլ մեր մարզիկի ակտիվությունը կար, իսկ մրցակիցը նկատողություն չստացավ: Բացի այդ էլ Դավթյանը պարանոցին հարված ստացավ ու չհասցրեց կարգավորել շնչառությունը: Դրա համար էլ մեր ձյուդոիստին տվեցին երկրորդ նկատողությունը:

Արմեն Նազարյանի համար ի՞նչ կասեք:

Դե պարզ էր, որ Արմենը պետք է հաղթեր առաջին գոտեմարտում: Ինչ վերաբերում է երկրորդ գոտեմարտին, ապա ես իսկական Արմենին տեսա միայն այն բանից հետո, երբ լեհ մարզիկը «վազարի» ստացավ, Արմենը անմիջապես ակտիվացավ ու կարողացավ ինքն էլ նույն կարգի գցում կատարել: Սակայն հետո նորից պասիվացավ ու երկու «շիդո» ստանալով՝ պարտվեց: Նկատողություններով պարտվելը պատահականություն չէ: Ես կարծում եմ, որ մարզչական կազմը չէր կարողացել ինչպես հարկն է պատրաստել տղաներին տակտիկապես: Իսկ ահա ֆունկցիոնալ, ֆիզիկական ու տեխնիկական պատրաստականությամբ մերոնք ոչ մեկի էլ չէին զիջում:

Զրուցեց Խաչիկ Չախոյանը