Օլիմպիական Միքայել Քոլոյան. Չստացվեց վերջին 25 մետրը
15:54 31 հուլիսի, 2012Գոհ չեմ իմ ելույթից: Լավ սկսեցի, լավ ընթացա, բայց վերջում ամեն ինչ ձախողվեց, NEWS.am Sport-ի թղթակցի հետ զրույցում իր մասնակցությունը մեկնաբանեց Լոնդոնի Օլիմպիական խաղերի լողի մրցաշարում Հայաստանի ներկայացուցիչ Միքայել Քոլոյանը:
Հիշեցնենք, որ Միքայել Քոլոյանը ազատ լողաոճի 100 մետրում ցույց տվեց 53.82 վայրկյան արդյունք: Ընդհանուր հաշվարկում 60 մասնակիցների մեջ հայ լողորդը զբաղեցրեց 45-րդ տեղը՝ դուրս մնալով հետագա պայքարից:
Ինչպե՞ս կգնահատես ելույթդ:
Նորմալ: Բայց՝ ոչ լավ: Շատ լավ սկսեցի, հիանալի մեկնարկեցի, առաջին 75 մետրը վստահ հաղթահարեցի, միայն թե՝ 75 մետրից հետո ամեն ինչ իմ ցանկությանը հակառակ գնաց… Լավ չստացվեց վերջին 25 մետր տարածությունը:
Ինչո՞ւ: Ի՞նչն էր պատճառը:
Չգիտեմ… Վերջին 25 մետր տարածությունը այսպես ասած՝ «չձգեցի»:
Ուժերդ չբավականացրեցի՞ն…
Դե կարելի է այդպես ասել: Չհաջողվեց:
Մրցակիցներդ ուժեղ էի՞ն:
Բավական: Այստեղ թույլ մասնակից չկա: Լողը մյուս օլիմպիական մարզաձեւերի նման չէ: Բոլորն էլ իրենց երկրների լավագույններն են եւ լավ արդյունքներ ունեն: Իսկ լավագույնների հետ պայքարելը միշտ էլ բարդ է լինում: Մրցակցությունը շատ բարձր է:
Միքայել, ընդհանուր առմամբ քո ելույթից գո՞հ ես, թե՞ չկարողացար ցուցադրել այն, ինչ կարող էիր:
Միանշանակ, գոհ չեմ: Բնականաբար, կարող էի ավելին եւ ընդունակ էի ավելիին: Չհասկացա՝ ինչն ինձ խանգարեց վերջին 25 մետր տարածությունում: Մեկնարկից առաջ շատ վստահ էի եւ նույնքան վստահ էլ կանգնեցի մեկնարկին: Բանն այն է, որ միանգամից իմ արագությունն ընկավ վերջում: Գրանցեցի 53.82 արդյունք: Նույնիսկ, Հայաստանի ռեկորդ չսահմանեցի:
Գուցե լարվածությո՞ւնը քեզ խանգարեց:
Անհասկանալի է… Չեմ կարող ասել:
Տրամադրությունդ ընկե՞լ է:
Այո… Նույնիսկ չգիտեմ, որերորդ տեղում եմ հայտնվել:
Զրուցեց Լուսինե Շահբազյանը
© 2026 NEWS.am - Sport
The copyright for information published on this web site is owned exclusively by Armenian News-NEWS.am information-analytical agency. All information materials published on this website are intended solely for personal use. For full or partial reproduction of any material in other media it is required to acquire written permission from Armenian News-NEWS.am information-analytical agency. Those, who have committed copyright violations, will be prosecuted accordingly.