Հենրիխ Մխիթարյանը չի կարող մասնակցել «Չելսիի» դեմ գավաթային խաղին

Լոնդոնի «Արսենալի» նորեկ Հենրիխ Մխիթարյանը չի մասնակցի «Չելսիի» դեմ Անգլիական լիգայի գավաթի խաղարկության կիսաեզրափակիչի պատասխան խաղին, գրում է express.co.uk-ը:

Հայաստանի ազգային հավաքականի կիսապաշտպանը չի կարող հանդես գալ Անգլիական լիգայի գավաթի այս խաղարկությունում, քանի որ ընթացիկ մրցաշրջանում այդ մրցաշարին մասնակցել է նաեւ «Մանչեսթեր Յունայթեդի» կազմում:

«Արսենալ» - «Չելսի» հանդիպումը կկայանա հունվարի 24-ին՝ Երեւանի ժամանակով 23:55-ին: Առաջին խաղում գրանցվել է գոլազուրկ ոչ ոքի:

Հիշեցնենք, որ հունվարի 22-ին Մխիթարյանը երկարաժամկետ պայմանագիր էր կնքել «Արսենալի» հետ եւ ստացել է 7 համարի մարզաշապիկը: Այս մրցաշրջանում «Արսենալի» 7 համարը պատկանում էր չիլիացի հարձակվող Ալեքսիս Սանչեսին, որին «Մանչեսթեր Յունայթեդը» փոխանակեց Հենրիխ Մխիթարյանի հետ:

Բրիտանական մամուլի համաձայն՝ «Արսենալում» հայ ֆուտբոլիստը կստանա շաբաթական 180 հազար ֆունտ ստերլինգ աշխատավարձ եւ կդառնա ակումբի երկրորդ ամենաբարձր վարձատրվող ֆուտբոլիստը Ալեքսանդր Լյակազեթից հետո (ֆրանսիացի հարձակվողը ստանում է շաբաթական 200 հազար ֆունտ): «Մանչեսթեր Յունայթեդում» Մխիթարյանը ստանում էր շաբաթական 150 հազար ֆունտ ստերլինգ:

Հայ կիսապաշտպանը 2016-ից խաղում էր «Մանչեսթեր Յունայթեդում», որի կազմում անցկացրել է 39 հանդիպում եւ դարձել 5 գոլի հեղինակ: Կարիերայի ընթացքում Մխիթարյանը հանդես է եկել նաեւ Երեւանի «Փյունիկում» (2006-2009), Դոնեցկի «Մետալուրգում» (2009-2010), Դոնեցկի «Շախտյորում» (2010-2013) եւ Դորտմունդի «Բորուսիայում» (2013-2016):