Ֆերգյուսոնը դեռ 2011–ին փորձել է ձեռք բերել Ալեքսիս Սանչեսին

17:41   22 հունվարի, 2018

«Մանչեսթեր Յունայթեդը» դեռ 2011 թվականին ցանկացել է իտալական «Ուդինեզեից» ձեռք բերել չիլիացի հարձակվող Ալեքսիս Սանչեսին, սակայն նա նախընտրել է կարիերան շարունակել «Բարսելոնայում», որի գլխավոր մարզիչն այն ժամանակ Խոսեպ ԳՎարդիոլան։ Այդ մասին պատմել է «Մանչեսթեր Յունայթեդի» նախկին գլխավոր մարզիչ Ալեքս Ֆերգյուսոնը, փոխանցում էmanchestereveningnews–ը։

Խոսեպ Գվարդիոլան այժմ «Մանչեսթեր Սիթիի» գլխավոր մարզիչն է եւ մինչեւ հունվարյան տրանսֆերային պատուհանի բացվելը ցանկանում էր ձեռք բերել Ալեքսիս Սանչեսին Լոնդոնի «Արսենալից»։ Սակայն երբ հայտնի դարձավ, որ Սանչեսը դիտարկում է նաեւ «Մանչեսթեր Յունայթեդ» տեղափոխվելու տարբերակը, դադարեցրեց բանակցությունները չիլիացի ֆուտբոլիստի հետ։

«Լիվերպուլի» գերմանացի գլխավոր մարզիչ Յուրգեն Կլոպը ենթադրել էր, որ Գվարդիոլան չի ցանկացել գործ ունենալ մի ֆուտբոլիստի հետ, որի համար իր ղեկավարած թիմին միանալը այլընտրանք ունի։  

2011 թվականին «Բարսելոնան» Սանչեսի համար վճարել էր 26 միլիոն եվրո։

2014թ. հուլիսին Սանչեսը 31,7 միլիոն ֆունտ ստերլինգով տեղափոխվեց «Արսենալ», որն անցած մրցաշրջանից փորձում էր երկարաձգել 29–ամյա խաղացողի պայմանագիրը, սակայն չհասավ հաջողության։

Այժմ Սանչեսը սպասում է Մեծ Բրիտանիայում աշխատանքի իրավունքի երկարաձգմանը եւ «Մանչեսթեր Յունայթեդի» հետ պայմանագիր կնքելուն։ Նրա տրանսֆերի գործարքում ներառված է Հայաստանի հավաքականի կիսապաշտպան Հենրիխ Մխիթարյանի տեղափոխությունը «Մանչեսթեր Յունայթեդից» «Արսենալ»։ Հայ ֆուտբոլիստը հունվարի 21–ին Լոնդոնում նշել է ծննդյան 29–րդ տարեդարձը եւ սպասում է գարծարքի ավարտին։



© 2019 NEWS.am - Sport

Սույն կայքում տեղ գտած լրատվական հրապարակումների հեղինակային իրավունքը պատկանում է բացառապես NEWS.am լրատվական-վերլուծական գործակալությանը։Սույն կայքի բոլոր լրատվական հրապարակումները անհատական օգտագործման համար են։ Տեղեկատվություն տարածող այլ միջոցներում սույն կայքի հրապարակումների (մասնակի կամ ամբողջական) վերահրապարկման համար անհրաժեշտ է NEWS.am լրատվական-վերլուծական գործակալության գրավոր թույլտվությունը։Խախտում թույլ տված անձինք կենթարկվեն պատասխանատվության օրենքով սահմանված կարգով։