18:54 27 դեկտեմբերի, 2017Հայաստանի նախագահ Սերժ Սարգսյանը մայրաքաղաքի Կարեն Դեմիրճյանի անվան մարզահամերգային համալիրում մասնակցել է տարվա 10 լավագույն մարզիկների պարգեւատրությանը:
«Անցնող տարում մեր մարզաշխարհի ներկայացուցիչները իրոք արձանագրեցին լուրջ հաջողություններ: Մեզ համար ձեր հաղթանակներն իսկապես թանկ են եւ կարեւոր: Դա մեր ողջ ժողովրդի եւ հատկապես երիտասարդ սերնդի ներկայացուցիչների մեջ արթնացնում է մեծ ոգեւորություն: Զանգվածային սպորտը պետք է դառնա մեր հասարակության կենսակերպի բաղկացուցիչ մասը: Ժողովրդական խոսքն ասում է` հիվանդներին բուժելը շատ ավելի թանկ է, քան առողջներին պահելն ու պահպանելը: Մարդիկ պետք վարեն առողջ կենսակերպ: Այս հաղթանակները մեզ համար նաեւ թանկ են մասնավորապես Հայաստանի հանրահռչակմանը նպաստելու առումով: Շնորհակալ եմ Հայաստանի պատիվը բարձր պահող, բարձր նվաճումների հասած բոլոր մարզիկներին: Դուք արժանի զավակներ եք, եւ մենք հպարտանում ենք ձեզնով:
Այս անգամ փորձ է արվել նոր կարգով անցկացնել Հայաստանի լավագույն մարզիկների տասնյակի ընտրությունը: Հաղթանակները պետք է նվաճվեն արդար մրցակցությամբ: Այս տարվա լավագույն մարզիկների տասնյակը ճանաչվում է ողջ սպորտային համայնքի, հանրության, մարզական լրագրողների կողմից:
Արդեն հանձնարարել եմ քննարկել եւ մշակել սփյուռքի մարզական կառույցների եւ սփյուռքահայ մարզիկների ներգրավումը այս մրցանակաբաշխությանը: Դա այս միջոցառմանը կհաղորդի նոր տրամաբանություն եւ որակ:
Համոզված եղեք, որ ձեր առջեւ ծառացած խնդիրներն իմ ուշադրության կենտրոնում են լինելու մշտապես: Շնորհակալ եմ ՀԱՕԿ նախագահ Գագիկ Ծառուկյանին սպորտի առջեւ ծառացած խնդիրներին լուծում տալու եւ հայկական սպորտի զարգացմանը նպաստելու համար»,- ասաց նախագահ Սերժ Սարգսյանը:
Մինչ երկրի ղեկավարը կհեռանար բեմից, Գագիկ Ծառուկյանը իր կողմից նվեր հանձնեց երկրի նախագահին եւ խնդրեց իր ձեռքով ավտոմեքենա նվիրել օլիմպիական չեմպիոն Իսրայել Միլիտոսյանին:
Սերժ Սարգսյանը հանձնեց մրցանակը եւ ասաց.
«Ինչքան ոգեւորիչ են այսպիսի միջոցառումները: Իսրայել Միլիտոսյանը անկախ Հայաստանի առաջին օլիմպիական չեմպիոնն է եւ երկար ժամանակ մոռացության էինք մատնել նրան: Ես ներողություն եմ խնդրում, որ երկար ժամանակ անուշադրության եւ մոռացության ենք տվել ձեր վաստակը հայկական մեծ սպորտում»,- նշեց Սերժ Սարգսյանը:
Հայաստանի նախագահը մի շարք մարզիչների հանձնեց ֆիզիկական կուլտուրայի եւ սպորտի վաստակավոր գործչի կոչումներ, եւ Հայաստանի վաստակավոր մարզչի կոչումներ:
Արթուր Ալեքսանյանը ՀՀ նախագահի հրամանագրով պարգեւատրվեց անվանական զենքով, որը օլիմպիական չեմպիոնին հանձնեց Սերժ Սարգսյանը:



Լուսինե Շահբազյան
Ֆոտո՝ Արսեն Սարգսյան
The copyright for information published on this web site is owned exclusively by Armenian News-NEWS.am information-analytical agency. All information materials published on this website are intended solely for personal use. For full or partial reproduction of any material in other media it is required to acquire written permission from Armenian News-NEWS.am information-analytical agency. Those, who have committed copyright violations, will be prosecuted accordingly.