Օլիմպիական Արթուր Ալեքսանյան. Լեւոն Ջուլֆալակյանը ե՛ւ ընկեր է, ե՛ւ մարզիչ, ե՛ւ հայր

13:50   30 հուլիսի, 2012

Սիրած աղջիկ չունեմ. ինձ ոգեշնչողներն առայժմ միայն հարազատներս են, Օլիմպիական խաղերում էլ ինձ կոգեշնչեն նրանք, նրանց հետ մեր թիմը, մարզիչները  եւ ամբողջ Գյումրին: NEWS.am Sport-ի թղթակցի հետ զրույցում ասաց 96 կգ քաշային հունահռոմեական ըմբիշ, Եվրոպայի չեմպիոն, գյումրեցի Արթուր Ալեքսանյանը:

Այս օրերին Արթուր Ալեքսանյանը հավաքականի հետ վերջին մարզումներ է անցկացնում Լոնդոն մեկնելուց առաջ:

Արթուր Ալեքսանյանը օլիմպիական գորգ դուրս կգա օգոստոսի 7-ին։

Արթուր, մի քանի օր է մնացել ելույթիդ. Ի՞նչ տրամադրությամբ ես մեկնում Լոնդոն:

Տրամադրությունս շատ լավ է: Մարզավիճակս եւս:  Գնում եմ  հաղթելու: Այլ տրամադրություն չեմ էլ կարող ունենալ: Իրավունք չունեմ…

Անհանգստանո՞ւմ ես Խաղերից առաջ:

Անհանգստություն կա, բայց այն ինձ չի խանգարում: Կարելի է ասել` չեմ անհանգստանում: Չեմ կենտրոնանում, որ Օլիմպիական խաղեր են: Ինքս ինձ տրամադրում եմ, որ սովորական մրցումներ են: Բայց չկա մի մրցում, որից առաջ մարզիկը չմտածի եւ թեկուզ փոքրիկ անհանգստություն հոգու խորքում չունենա: Դա բնական երեւույթ է: Այդպես էլ պետք է լինի: Ուղղակի այդ անհանգստությունը միայն դու պետք է զգաս եւ ուրիշ ոչ ոք:

Ի՞նչ է քեզ համար մասնակցությունը Օլիմպիական խաղերին:

Կարիերայիս գագաթնակետն է: Յուրաքանչյուր մարզիկ իր կարիերայի ընթացքում մտածում է Օլիմպիական խաղերին մասնակցելու մասին:  Ես ընդգրկվելու մասին այդքան էլ չեմ երազել, բայց բարձր արդյունքի մասին ամեն րոպե եմ երազում: Եթե մարզիկ ես, ուրեմն քո կյանքի նպատակը Խաղերում ոսկե մեդալ նվաճելը պետք է լինի:

Ի՞նչ հարաբերությունների մեջ ես հավաքականի մարզիչ Լեւոն Ջուլֆալակյանի հետ:

Ջերմ, ընկերական: Գորգից դուրս նա մեզ համար եւ ընկեր է, եւ մարզիչ, եւ հայր։ Նա մեզ շատ է օգնում իր խորհուրդներով եւ փորձում է հնարավորինս փոխանցել մեզ իր փորձը:


Ի՞նչ կամ ո՞վ է զբաղեցնում քո միտքը գոտեմարտի ընթացքում:

Գոտեմարտի ընթացքում չես կարող ուրիշ բանի կամ որեւէ մեկի մասին մտածել: Մտածում ես միայն հաղթելու, ճիշտ մարտավարության, ճիշտ քայլեր անելու մասին:

Ո՞վ է քեզ ոգեշնչում գորգի վրա` գոտեմարտելիս:

Իմ հարազատները, ինձ շրջապատող մարդիկ:

Իսկ սիրած աղջի՞կ…

Սիրած աղջիկ դեռեւս չունեմ: Այժմ միայն ես եմ եւ իմ ընտրած մարզաձեւը: Եթե նույնիսկ ունենամ էլ սիրած աղջիկ, նրա մասին չեմ մտածի կամ հիշի գորգի վրա: Գորգի վրա իմ ուղեղն աշխատում է միայն հաղթական ավարտի ուղղությամբ:

Զրուցեց Լուսինե Շահբազյանը

Լուսանկարը՝ Սոնա Բարսեղյանի



© 2024 NEWS.am - Sport

Սույն կայքում տեղ գտած լրատվական հրապարակումների հեղինակային իրավունքը պատկանում է բացառապես NEWS.am լրատվական-վերլուծական գործակալությանը։Սույն կայքի բոլոր լրատվական հրապարակումները անհատական օգտագործման համար են։ Տեղեկատվություն տարածող այլ միջոցներում սույն կայքի հրապարակումների (մասնակի կամ ամբողջական) վերահրապարկման համար անհրաժեշտ է NEWS.am լրատվական-վերլուծական գործակալության գրավոր թույլտվությունը։Խախտում թույլ տված անձինք կենթարկվեն պատասխանատվության օրենքով սահմանված կարգով։