Ժոզե Մոուրինյոն բացատրել է, թե ինչու Հենրիխ Մխիթարյանը չի խաղում
12:10 14 դեկտեմբերի, 2017«Մանչեսթեր Յունայթեդի» գլխավոր մարզիչ Ժոզե Մոուրինյոն «Բորնմութի» դեմ Անգլիայի առաջնության 17-րդ տուրի խաղից (1:0) հետո բացատրել է, թե ինչու Հայաստանի հավաքականի կիսապաշտպան Հենրիխ Մխիթարյանը չի հայտավորվում անգլիական ակումբի վերջին խաղերին:
«Պահեստայինների նստարանին կարող են լինել 6 խաղացողներ, եւ ես փորձում եմ պահել բալանսը: Իմ տրամադրության տակ կային 2 պաշտպաններ, որոնք կարող են խաղալ տարբեր դիրքերում, ինչպես նաեւ Էշլի Յանգը, Անդեր Էրերան, Զլատան Իբրահիմովիչն ու Մարկուս Ռեշֆորդը:
Մարտիալին, Լինգարդին ու Մատային ես ընդգրկել էի մեկնարկային կազմում: Եթե ես օգտագործեի Մխիթարյանին, ապա նրանցից մեկը պետք է դուրս մնար հայտացուցակից: Սակայն այսօր ես կարծում եմ, որ նրանք արժանի են դաշտ դուրս գալուն»,- մարզիչի խոսքը մեջբերում է «Մանչեսթեր Յունայթեդի» կայքը:
«Մանչեսթեր Յունայթեդի» մամուլի ծառայությունը հայտնում է, որ Հենրիխ Մխիթարյանը ջանասիրաբար մարզվում է եւ պատրաստվում «Վեստ Բրոմվիչի» դեմ Պրեմյեր լիգայի հաջորդ տուրի խաղին, որը կկայանա դեկտեմբերի 17-ին:
Հիշեցնենք, որ 28-ամյա կիսապաշտպանը հայտավորվել է «Մանչեսթեր Յունայթեդի» վերջին 8 խաղերից միայն մեկին՝ դուրս գալով փոխարինման: Վերջերս մամուլում լուրեր են շրջանառվում, որ ձմեռային տրանսֆերային պատուհանի ժամանակ նա հեռանալու է անգլիական ակումբից: Հայ ֆուտբոլիստի ծառայություններով հետաքրքրված են նրա նախկին ակումբ Դորտմունդի «Բորուսիան» ու իտալական «Ինտերը»:
ՖԻՖԱ-ի տարվա լավագույն մարզիչի քվեարկության լավագույն եռյակում Հենրիխ Մխիթարյանը չէր նշել Ժոզե Մոուրինյոյի անունը: Հայաստանի հավաքականի ավագն առաջինը նշել էր Զինեդին Զիդանին («Ռեալ»), երկրորդում՝ Թուրինի «Յուվենտուսը» գլխավորող Մասիմիլիանո Ալեգրիին, իսկ երրորդում` «Մոնակոյի» գլխավոր մարզիչ Լեոնարդո Ժարդիմին: ՖԻՖԱ-ի տարվա լավագույն ֆուտբոլիստի եւ մարզիչի քվեարկությանը մասնակցում են ազգային հավաքականների ավագները:
© 2026 NEWS.am - Sport
The copyright for information published on this web site is owned exclusively by Armenian News-NEWS.am information-analytical agency. All information materials published on this website are intended solely for personal use. For full or partial reproduction of any material in other media it is required to acquire written permission from Armenian News-NEWS.am information-analytical agency. Those, who have committed copyright violations, will be prosecuted accordingly.