20:38 13 դեկտեմբերի, 2017Oրերս կայացած Հայաստանի ըմբշամարտի ֆեդերացիայի նիստում կազմակերպության փոխնախագահ է ընտրվել հունահռոմեական ըմբշամարտի Հայաստանի հավաքականի մարզիչ Սամվել Գեւորգյանը: Նա նաեւ կզբաղվի հունահռոմեական ըմբշամարտի համակարգմամբ:
Այս մասին NEWS.am Sport-ի թղթակցի հետ զրույցում տեղեկացրեց ՀԸՖ գլխավոր քարտուղար Արայիկ Բաղդադյանը:
Վերջին շրջանում Հայաստանի ըմբշամարտի ֆեդերացիայի գործոկոմում պարբերաբար փոփոխություններ եւ նոր նշանակումներ են լինում: Ֆեդերացիայի նախկին նախագահ Սամվել Կարապետյանի հրաժարականից հետո ֆեդերացիայի նախագահի պաշտոնավարումը ժամանակավոր ստանձնեց Հայաստանի սպորտի նախարար Հրաչյա Ռոստոմյանը: Նա զբաղվում է նաեւ Հայաստանի ծանրամարտի ֆեդերացիայի համակարգմամբ: Ըմբշամարտի ֆեդերացիայի նախագահի պաշտոնակատարի ստանձնումից հետո մարզաձեւի երկու ոճերում առանձին նշանակվեցին փոխնախագահներ` հունահռոմեականում` Արսեն Բադալյանը, իսկ ազատ ոճում` Ռոբերտ Խաչատրյանը: Մի քանի ամիս անց նախկին ըմբիշ, Հայաստանի սպորտի վետերանների միության նախագահ Արսեն Բադալյանը հրաժարական տվեց փոխնախագահի պաշտոնից:
«Օրերս կայացած ֆեդերացիայի նիստում կրկին փոփոխություններ տեղի ունեցան: Քանի որ Արսեն Բադալյանը հրաժարական տվեց, նրան կփոխարինի հունահռոեմական ըմբշամարտի Հայաստանի հավաքականի մարզիչ Սամվել Գեւորգյանը: Այժմ հունահռոմեական ըմբշամարտը կհամակարգի Սամվել Գեւորգյանը»,- ասաց Արայիկ Բաղդադյանը:
Սամվել Գեւորգյանն այս պաշտոնում եղել է նաեւ 2001-2016 թվականներին: Նա նաեւ Երեւանի ըմբշամարտի ֆեդերացիայի նախագահն է:
Ըստ նախնական տեղեկությունների, դեկտեմբերին պետք է կայանար ըմբշամարտի Հայաստանի առաջնությունը: Բայց NEWS.am Sport-ի թղթակցի հետ ճեպազրույցում հունահռոմեական ըմբշամարտի Հայաստանի հավաքականի գլխավոր մարզիչ Լեւոն Ջուլֆալակյանը նշել է, որ Հայաստանի առաջնությունը հետաձգվել է մինչեւ 2018 թվականի հունվար:
«Ըմբշամարտում մի շարք փոփոխություններ են եղել, նոր կանոնակարգ կա, որն ուժի մեջ է մտնելու 2018 թվականի հունվարի 1-ից: Մենք մշտապես Հայաստանի առաջնություններն անցկացրել ենք յուրաքանչյուր տարվա ավարտին, որպեսզի նոր հավաքականներով սկսենք նոր տարին, նոր մրցաշարերով: Այս տարի միջազգային ֆեդերացիան թույլ չի տալիս հին օրենքներով մրցաշարեր անցկացնել մինչեւ հունվարի 1-ը եւ նոր տարվա հավաքականները կազմել ոչ նոր կանոնակարգով անցկացված ներքին առաջնություններով»,- ասել է Լեւոն Ջուլֆալակյանը:
Տարեվերջյան արդեն ավանդույթ դարձած ծաղկաձորյան հավաքը եւս քննարկման փուլում է: Հիշեցնենք, որ յուրաքանչյուր տարի հունահռոմեական եւ ազատ ոճի ըմբիշները տարին ավարտում էին Ծաղկաձորում անցկացվող հավաքներով:
Լուսինե Շահբազյան
The copyright for information published on this web site is owned exclusively by Armenian News-NEWS.am information-analytical agency. All information materials published on this website are intended solely for personal use. For full or partial reproduction of any material in other media it is required to acquire written permission from Armenian News-NEWS.am information-analytical agency. Those, who have committed copyright violations, will be prosecuted accordingly.