Սպորտի նախարար: Ամբողջ թիմին կորակազրկեին, եթե դոպինգի խնդիր լիներ. Տիգրան Մարտիրոսյանը վնասվածք է ստացել
20:25 29 հուլիսի, 2012Տիգրան Մարտիրոսյանը վնասվածք է ստացել, դոպինգի խնդիր չկա, NEWS.am Sport-ի թղթակցի հետ զրույցում հայտարարեց Լոնդոնում գտնվող սպորտի նախարար Հրաչյա Ռոստոմյանը՝ կոչ անելով չհավատալ շրջանառվող լուրերին եւ սպասել ոսկե մեդալների։
Պարոն Ռոստոմյան, մանրամասն կասե՞ք Տիգրան Մարտիրոսյանի վնասվածքի մասին:
Նա վնասվածք ստացավ Պոդոլսկում, մարզումների նախավերջին օրը: Վնասվածքը խորացավ, եւ նա չկարողացավ մասնակցել Խաղերին:
Տիգրանին փոխարինող մարզիկ չկա՞: Ինչո՞ւ ժամանակին այլ ծանրորդի չէիք հայտավորել:
Մենք վերջնական հայտը ներկայացրել ենք եւ այն փոխելու իրավունք չունենք: Մենք չէինք կանխատեսել, որ Տիգրան Մարտիրոսյանը կարող է վնասվածք ստանալ:
Բայց ծանրամարտն այն մարզաձեւն է, որտեղ ամենից շատն է հավանական վնասվածք ստանալը:
Եթե մարդ բարոյականություն ունի, ինչպե՞ս կարող էր մտածել, որ Տիգրան Մարտիրոսյանը կարող էր վնասվածք ստանալ: Տենց մարդ կա՞… Նա մեկ ամիս առաջ չի վնասվածք ստացել, այլ մեկ օր առաջ, ընդամենը մեկ օր:
Պարոն Ռոստոմյան, լուրեր են շրջանառվում, թե Տիգրան Մարտիրոսյանը ոչ թե վնասվածք է ստացել, այլ չի հասցրել ամբողջությամբ մաքրվել դոպինգ-թեստից առաջ:
Անլուրջ բաներով եք զբաղված: Հասկանո՞ւմ եք, եթե դա լիներ դոպինգ, ամբողջ թիմին կորակազրկեին, այլ ոչ թե մի մարզիկի: Եթե դոպինգ է լինում, դա միայն մեկի վրա չի ազդում: Պետք չէ հավատալ ասեկոսեներին: Տիգրանի վնասվածքը շատերին մեծ ցավ պատճառեց:
Իսկ այլ մարզձեւերի մասին ի՞նչ կասեք: Գուցե սպասելիքներն ավելի շա՞տ էին:
Չէ, երեւի օրինաչափ է: Ասում են` ախորժակը ուտելիս է բացվում: Ձյուդոիստ Դավթյան Հովհաննեսը շատ մոտ էր հաջողության, բայց մի քանի դժվար գոտեմարտ անցկացնելուց հետո, ուժերը չհերիքեցին: Եթե համեմատենք 2008-ի Օլիմպիական խաղերի հետ, ապա ձյուդոյի արդյունքերն անհամեմատ լավացել են, եւ մենք վստահ ենք, որ ավելի լավ արդյունքերի ենք հասնելու:
Ոսկե մեդալի հույսեր պահպանե՞նք:
Իհարկե: Ամեն ինչ լավ է լինելու: Չե՞ք հավատում:
© 2026 NEWS.am - Sport
The copyright for information published on this web site is owned exclusively by Armenian News-NEWS.am information-analytical agency. All information materials published on this website are intended solely for personal use. For full or partial reproduction of any material in other media it is required to acquire written permission from Armenian News-NEWS.am information-analytical agency. Those, who have committed copyright violations, will be prosecuted accordingly.