Լոնդոն-2012. Հայաստանի միակ օլիմպիական մարմնամարզիկը վնասվածք է ստացել
16:58 28 հուլիսի, 201230-րդ Օլիմպիական խաղերում Հայաստանը ներկայացնող միակ մարմնամարզիկն Արթուր Դավթյանն է, որը հուլիսի 28-ին մեկնարկեց որակավորման փուլում։
Ազատ վարժություններում Արթուր Դավթյանը գրավեց 18-րդ տեղը, նժույգի վարժություններում՝ 10-րդ տեղը, օղակների վրա՝ 19-րդ տեղը, հենացատկի առաջին փուլում՝ 4-րդ տեղը, զուգափայտերի վարժություններում՝ 14-րդ տեղը, պտտաձողի վարժություններում՝ 19-րդ տեղը։
Արթուր Դավթյանը բոլոր վարժությունների հանրագումարում գրավեց 8-րդ տեղը։
Ելույթից հետո Արթուր Դավթյանի հետ զրուցել է NEWS.am Sport-ի թղթակիցը։
Արթուր, ինչպե՞ս ես գնահատում ելույթդ:
Ելույթս գնահատում եմ նորմալ: Արեցի այն, ինչ կարողացա, միայն թե վերջում ոտքի վնասվածք ստացա եւ դա ինձ կաշկանդեց: Ընթացքում ոտքս դիպավ գործիքին եւ ուժեղ ցավ զգացի: Այնուհետեւ ցավը գնալով ուժեղացավ եւ սկսեց արդեն զգացնել: Ավարտեցի ելույթս: Այդ պահին միայն մտածում էի, որ ցավը չխանգարի ինձ` ավարտեմ ելույթս: Այնքան ուժեղ էր ցավը, որ վերջում արդեն չէի կարողանում քայլել:
Իսկ ի՞նչն էր վնասվածքիդ պատճառը:
Պատճառը մարզագործիքների չորությունն էր: Հայաստանում, մեր մարզագործիքներն ավելի փափուկ են, որովհետեւ հին են եւ մաշված: Իսկ մաշվածության հաշվին դրանք փափկում են: Այս մարզագույքը չոր էր, քանի որ նոր էր: Երբ ոտքս դիպավ, այդ չորությունն ուժեղ ցավեցրեց:
Արթուր, ելույթ ունեցա՞ր քո հնարավորությունների սահմանում, թե՞ ավելի ցածր:
Վնասվածքի պատճառով՝ ավելի ցածր: Շատ խանգարեց ինձ այդ ցավը: Եթե ոտքս չցավեցնեի, ավելի վստահ կլինեի, որ անցել եմ եզրափակիչ: Հիմա մի փոքր կասկածում եմ: Պատասխանը ավելի ուշ կլինի: Ավագ մարզիչս` Սոսի Սարգսյանը եւս գոհ է իմ ելույթից: Ամեն ինչ պարզ կլինի քիչ ավելի ուշ: Եթե անցնեմ եզրափակիչ, արդեն ավելի ուշադիր կլինեմ:
© 2026 NEWS.am - Sport
The copyright for information published on this web site is owned exclusively by Armenian News-NEWS.am information-analytical agency. All information materials published on this website are intended solely for personal use. For full or partial reproduction of any material in other media it is required to acquire written permission from Armenian News-NEWS.am information-analytical agency. Those, who have committed copyright violations, will be prosecuted accordingly.