Շեւչենկոն հեռանում է ֆուտբոլից՝ սկսելով քաղաքական կարիերա

Ուկրաինայի ազգային հավաքականի հարձակվող Անդրեյ Շեւչենկոն որոշել է հեռանալ ֆուտբոլից:

Ուկրաինայի առաջնության երրորդ տուրի՝ «Գովերլայի» հետ խաղից հետո Կիեւի «Դինամոյի» 35-ամյա հարձակվողը հայտարարել, որ պատրսատվում է սկսել քաղաքական կարիերա: Շեւչենկոն այդ մասին պաշտոնապես կհայտարարի հուլիսի 28-ին:

«Ես կողմնորոշվել եմ ապագայիս հարցում: Պատրաստվում եմ սկսել քաղաքական կարիերա: Վաղը պաշտոնապես կհայտարարեմ այդ մասին: Հուսով եմ՝ կաջակցեք ինձ»,- Շեւչենկոյի խոսքը փոխանցում է rbc.ua-ն:

Մինչեւ Կիեւի «Դինամո» վերադառնալը Շեւչենկոն հանդես է եկել իտալական «Միլանում» եւ Լոնդոնի «Չելսիում»: Ուկրաինայի ազգային հավաքականի կազմում անցկացրել է 109 հանդիպում եւ դարձել է 48 գոլի հեղինակ: