Որակազրկված ձյուդոիստ Գրիգոր Սահակյան. Միշտ էլ մասնակցել եմ սամբոյի մրցաշարերի, խնդիր չի եղել

Այն, որ որակազրկվել եմ, տեղեկացել եմ լրատվամիջոցներից: Բայց սա չի նշանակում, որ դադարեցնում եմ ձյուդոյի մարզումներս: Եթե ֆեդերացիան գտնում է, որ ճիշտ է ինձ որակազրկելը, թող այդպես լինի:

Այս մասին NEWS.am Sport-ի թղթակցի հետ զրույցում ասաց ձյուդոյի Եվրոպայի առաջնության բրոնզե մեդալակիր, սամբոյի երիտասարդների Եվրոպայի եւ աշխարհի չեմպիոն Գրիգոր Սահակյանը:

Հայաստանի ձյուդոյի ֆեդերացիան հոկտեմբերի 18-ին տեղի ունեցած ընդլայնված նիստում որոշել է ձյուդոյի Հայաստանի երիտասարդական հավաքականի առաջատար, 90 կգ քաշային Գրիգոր Սահակյանին մեկ տարով որակազրկել: 2 օր անց մարզիկի որակազրկումը պաշտոնապես հաստատվեց:

Գրիգոր, մեկ տարով որակազրկվել ես: Տեղյակ եղե՞լ ես, որ Հայաստանի ձյուդոյի ֆեդերացիան քեզ որակազրկելու է: Իրականում, ինչո՞ւ են քեզ որակազրկել:

Ես տեղյակ չեմ եղել, որ ինձ որակազրկել են: Ֆեդերացիայի նիստին ներկա է եղել իմ անձնական մարզիչը: Բայց այն, որ մեկ տարով որակազրկվել եմ, այդ մասին տեղեկացել եմ լրատվամիջոցներից: Ինձ որեւէ մեկը չի տեղեկացրել: Պատճառն էլ իմացել եմ լուրերից՝ այն, որ ես մասնակցել եմ սամբոյի աշխարհի առաջնությանը եւ բաց եմ թողել ձյուդոյի երիտասարդների աշխարհի առաջնությունը: Այսքանը գիտեմ:  

Ձյուդոյի երիտասարդների Եվրոպայի առաջնությունից հետո, որտեղ նվաճեցի բրոնզե մեդալ, պետք է նախապատրաստվեի հոկտեմբերի 18-22-ը Խորվաթիայում կայանալիք երիտասարդների աշխարհի առաջնությանը: Այդ միջակայքում էր նաեւ սամբոյի աշխարհի առաջնությունը: Հոկտեմբերի 14-ին Հայաստանի թիմի հետ Սերբիայի Նովի Սադ քաղաքում մասնակցեցի սամբոյի երիտասարդների աշխարհի առաջնությանը եւ դարձա չեմպիոն: Հոկտեմբերի 15-ին վերադարձա Հայաստան եւ ցանկանում էի պատրաստվել ձյուդոյի երիտասարդների աշխարհի առաջնությանը, բայց ինչ-ինչ պատճառներով չստացվեց: Ես ցանկանում էի մասնակցել ձյուդոյի երիտասարդների աշխարհի առաջնությանը, այնպես չէ, որ խուսափել եմ ձյուդոյի մրցաշարերից, բայց ինձ չտարան:

Իսկ ո՞վ է որոշում, թե դու որ մարզաձեւի մրցաշարին պետք է մասնակցես:

Որոշումը, թե որ մարզաձեւի մրցաշարերին պետք է մասնակցել, կայացնում ենք ես եւ անձնական մարզիչս: Ես մշտապես մասնակցել եմ երկու մարզաձեւրի մրցաշարերին էլ: Ձյուդոյի ֆեդերացիան չի արգելել հանդես գալ նաեւ սամբոյի մրցաշարերում:

Իսկ այդ շրջանում ինչո՞ւ բաց թողեցիր ձյուդոյի երիտասարդների աշխարհի առաջնությունը եւ ինչո՞ւ նախապատվությունը տվեցիր սամբոյին:

Ընտրությունն այսպես է եղել. ես կուզեի երկու մրցաշարերին էլ մասնակցել, երկուսում էլ պատրաստ էի պայքարի մեջ մտնելուն: Բայց հնարավոր չեղավ, չստացվեց:

Ժամանակային առումով հնարավորություն չունեցա՞ր նախապատրաստվել:

Հնարավոր էր հասցնել, քանի որ հոկտեմբերի 15-ին ես վերադարձել էի, իսկ ձյուդոյի երիտասարդների աշխարհի առաջնությունը մեկնարկում էր հոկտեմբերի 18-ին: Ուղղակի չստացվեց:

Իսկ նախապես պայմանավորվածություն չկա՞ր ֆեդերացիայի հետ, որ այդ արանքում կա սամբոյի աշխարհի առաջնություն եւ դու պետք է հանդես գաս նաեւ այնտեղ:

Ես միշտ էլ մասնակցել եմ սամբոյի մրցաշարերին: Մինչ այս խնդիր չի եղել իմ մասնակցության հետ կապված: Որեւէ տեղ փաստաթղթով հաստատված կամ կնքված չէ, որ մենք իրավունք չունենք մասնակցել սամբոյի մրցաշարերին:

Իսկ ինչպե՞ս ես արձագանքել այս որակազրկմանը: Ճի՞շտ է արդյոք վարվում ֆեդերացիան՝ քեզ որակազրկելով:

Եթե իրենց կարծիքով ինձ որակազրկելը ճիշտ է, թող այդպես լինի... Չգիտեմ... Ինձ համար շատ տարբերություն չկա, անկեղծ ասած: Եթե որակազրկել են եւ գտնում են, որ այդպես ճիշտ է, ուրեմն՝ ճիշտ է: Մեկ տարի չեմ կարող մասնակցել ձյուդոյի մրցաշարերին: Առաջին անգամ է ինձ հետ նման բան պատահում: Միայն գիտեմ, որ արդեն պաշտոնապես հաստատված է, որ ես որակազրկված եմ:

Ես գիտակցում եմ, որ ձյուդոյի մարզումների, հավաքների շնորհիվ դարձա սամբոյի աշխարհի չեմպիոն, բայց մի նրբություն էլ կա՝ սամբոյի արդյունքների շնորհիվ է, որ ես կարողացել եմ ձյուդոյով մարզվել բանակում ծառայությանս ընթացքում: Սամբոյի արդյունքների շնորհիվ ես զորակոչվեցի բանակ ու ինձ տարան սպորտային վաշտ: Այնպես, որ սամբոն ինձ, որպես ձյուդոիստի, քիչ բան չի տվել: Միակողմանի պետք չէ նայել հարցին: Ձյուդոյի ֆեդերացիան միակողմանի է գնահատում իրավիճակը: Ես կորցնելու բան չունեմ: Որակազրկումն էլ իմ կյանքում ոչինչ չի փոխել:

Նախքան նիստը եւ քեզ որակազրկելու որոշումը որեւէ մեկը ֆեդերացիայից քեզ հետ չի խոսե՞լ, չի տեղեկացրե՞լ, որ նիստի ընթացքում քվեարկության է դրվելու քեզ որակազրկելու հարցը: Կամ որեւէ մեկը չի նախազգուշարցե՞լ, որ օլիմպիական մարզաձեւի Եվրոպայի երիտասարդների առաջնությանը չմասնակցելու համար քեզ սպառնում է որակազրկում:

Որեւէ մեկն ինձ նախապես չի զգուշացրել, նախքան նիստը եւ նիստից հետո էլ ոչ ոք ինձ տեղյակ չի պահել, որ ես որակազրկված եմ: Նույնիսկ մարզիչս ինձ հետ այս թեմայով չի խոսել: Իմ որակազրկման մասին, ինչպես արդեն սկզբում ասացի, տեղեկացել եմ լրատվամիջոցներից:

Մեկ տարի բաց ես թողնելու ձյուդոյի մրցաշարերը, այն դեպքում երբ դու համարվում ես առաջատարներից: Մեկ տարին բացասական ազդեցություն չի ունենա՞ ձյուդոիստի  կարիերայիդ վրա:

Բնական է, որ այս մեկ տարին իր բացասական ազդեցությունը կունենա: Բայց սա չի նշանակում, որ ես մեկ տարով դադարեցնելու եմ ձյուդոյի մարզումներս: Նորմալ, ըստ կարգի ես շարունակելու եմ ձյուդոյի մարզումներս: Մարզիկի կարիերաս սկսել եմ հենց ձյուդո մարզաձեւում: Ձյուդոյով զբաղվում եմ 9 տարեկանից: Սամբոն համատեղում եմ եւ երկու մարզաձեւում էլ ինձ լավ եմ զգում. չեմ կարող որեւէ մեկն առանձնացնել:

Լուսինե Շահբազյան