Լյուիս Հեմիլթոնը՝ Ֆորմուլա-1-ի քառակի չեմպիոն
00:58 30 հոկտեմբերի, 2017«Մերսեդեսի» բրիտանացի արշավորդ Լյուիս Հեմիլթոնը չորրորդ անգամ հռչակվեց Ֆորմուլա-1-ի աշխարհի չեմպիոն:
Մեքսիկայի Մեծ մրցանակում «Մերսեդեսի» առաջատարը գրավեց 9-րդ տեղը, սակայն դա նրան չխանգարեց ժամանակից շուտ ապահովել չեմպիոնի տիտղոսը: Առաջին տեղը գրավեց «Ռեդ Բուլի» հոլանդացի արշավորդ Մաքս Ֆերստապենը, որին հաջորդեց Վալտերի Բոտասը «Մերսեդեսից»: «Ֆերարիի» ֆինն արշավորդ Կիմի Ռայկոնենը գրավեց երրորդ տեղը:
Լյուիս Հեմիլթոնի գլխավոր մրցակից, «Ֆերարիի» գերմանացի արշավորդ Սեբաստիան Ֆետելը չորրորդն էր: Ֆետելն ու Հեմիլթոնը բախվեցին առաջին շրջանի ժամանակ, ինչի հետեւանքով չկարողացան գրավել մրցանակային տեղեր:
Մրցաշրջանի վերջին 2 Մեծ մրցանակներից առաջ բրիտանացի արշավորդն ունի 333 միավոր, իսկ Սեբաստիան Ֆետելը 277 միավորով երկրորդն է:
Լյուիս Հեմիլթոնը Ֆորմուլա-1-ի աշխարհի չեմպիոն դարձել էր նաեւ 2008, 2014 եւ 2015 թվականներին: Նախորդ տարի չեմպիոնի տիտղոսը նվաճել էր «Մերսեդեսի» նախկին արշավորդ Նիկո Ռոսբերգը, որը հաղթանակից հետո հայտարարեց կարիերան ավարտելու մասին:
© 2024 NEWS.am - Sport
Սույն կայքում տեղ գտած լրատվական հրապարակումների հեղինակային իրավունքը պատկանում է բացառապես NEWS.am լրատվական-վերլուծական գործակալությանը։Սույն կայքի բոլոր լրատվական հրապարակումները անհատական օգտագործման համար են։ Տեղեկատվություն տարածող այլ միջոցներում սույն կայքի հրապարակումների (մասնակի կամ ամբողջական) վերահրապարկման համար անհրաժեշտ է NEWS.am լրատվական-վերլուծական գործակալության գրավոր թույլտվությունը։Խախտում թույլ տված անձինք կենթարկվեն պատասխանատվության օրենքով սահմանված կարգով։