Անաստասիա Գալուստյան. Կարիերայիս ժամանակավոր դադարի պատճառը ֆինանսական է

Ժամանակից շուտ եմ ավարտում մարզական կարիերաս՝ գումար վաստակելու, ընտանիքիս օգնելու եւ ինձ ապահովելու համար, որպեսզի ծնողներիցս կախված չլինեմ:

Այս մասին NEWS.am Sport-ի թղթակցի հետ զրույցում Մոսկվայից ասաց գեղասահքի Հայաստանի հավաքականի առաջատար մենասահորդուհի, մոսկվացի Անաստասիա Գալուստյանը, ով Մոսկվայում անցկացված Rostelecom Cup մրցաշարում հանդես գալուց հետո հայտնել է մրցաշրջանը ժամանակից շուտ ավարտելու մասին:

Անաստասիա, դու հայտարարել ես, որ ժամանակից շուտ ես ավարտում այս  մրցաշրջանը:

Այն տեղեկությունը, որ ես ժամանակից շուտ եմ ավարտում մրցաշրջանը, շատ արագ տարածվեց, հանրության կողմից շատ կտրուկ ընդունվեց: Ես բազմաթիվ նամակներ, հաղորդագրություններ եմ ստացել, հարցերով, թե ինչու, ինչ է պատահել: Մի պահ նույնիսկ վախեցա մարդկանց այդ արձագանքից, կարծեցի, թե սխալ քայլ եմ անում: Բայց իրականում ժամանակից շուտ մրցաշրջանն ավարտելն իր պատճառներն ու հիմքերն ունի:

Մինչեւ պատճառներին անդրադառնալը, ինչպիսի՞ն էր այս մրցաշրջանը քեզ համար:

Մրցաշրջանը հաջողված չէր, քանի որ ես չկարողացա նվաճել օլիմպիական ուղեգիր, չնայած, որ ունեի երկու հնարավորություն: Սեպտեմբերի 28-ից հոկտեմբերի 2-ը Գերմանիայի Օբերսդորֆ քաղաքում մասնակցեցի օլիմպիական վարկանիշային մրցաշարի: Այն ժամանակ  ես գիտեի, թե Գերմանիայում անցկացվող Nebelhorn Trophy 2017  մրցաշարը վերջին վարկանիշայինն է Հարավային Կորեայում կայանալիք ձմեռային Օլիմպիական խաղերի համար: Այստեղ ես կանանց մենասահքի կարճ ծրագրից հետո 15-րդն էի, իսկ ազատ ծրագրում գրանցեցի 7-րդ արդյունքը: Ընդհանուր հաշվարկում գրավեցի 8-րդ տեղը: Իսկ օլիմպիական ուղեգիր նվաճում էին 1-6 տեղերը զբաղեցրած գեղասահորդները: Ես շատ էի ուզում, բայց ինչ-որ մի բան երեւի չբավարարեց: Գերմանիայում, երեւի, հոգեբանորեն լիարժեք պատրաստ չէի, ինչ-որ մի բան խանգարեց, որ ես լավագույն  6-ի մեջ հայտվեմ: Բացի այդ, միջազգային մրցաշարերում մենք չունենք միջազգային հայ մրցավար: Դա մեզ շատ է խանգարում: Մենք չունենք տեխնիկական անձնակազմ, միայն մեկ մրցավար ունենք, ով այդ մրցմանը մեզ հետ չէր:

Օրերս Մոսկվայում դու մասնակցեցիր նաեւ Rostelekom Cup-ին, որը նույնպես վարկանիշային էր:

Ինձ համար էլ էր անակնկալ, որ Գերմանիայից հետո, փաստորեն, մենք ունենք եւս  մեկ հնարավորություն: Բայց ես այնքան ուշ տեղեկացա Մոսկվայում կայանալիք վարկանիշային մրցաշարում մեր մասնակցության մասին, որ հոգեպես երեւի պատրաստ չէի սառույց դուրս գալուն եւ պայքարելուն: Մոսկվայի  մրցաշարում զբաղեցրի 12-րդ տեղը:

Գերմանիայի մրցաշարում դու զբաղեցրիր 8-րդ տեղը, բայց մեծ հնարավորություն ունեիր որպես պահեստային Օլիմպիական խաղերին մասնակցել: Մրցավարների գործոնը կա՞ր քեզ պահեստայինների մեջ չընդգրկելու հարցում, թե քո արդյունքը 8-րդ տեղի արդյունք էր:

Այս երկու մրցաշարերում բոլորը մրցավարական անարդարություն են տեսնում: Բայց ես որեւէ դժգոհություն չունեմ: Ես ցույց տվեցի այն արդյունքները, որոնց պատրաստ էի: Համաձայն եմ, որ հնարավորություն ունեի պահեստայինում լինել, բայց ինձ մրցավարները անարդար չդատեցին: Ստացա այն գնահատականը, որը հավաքել էի: Գեղասահքում մրցավարների համար մեծ ուշադրության են արժանանում ավելի մեծ եւ գեղասահքը զարգացած երկրներին: Մենք փոքր երկիր ենք, այսինքն մարզաշխարհում, որպես գեղասահորդ ինձ, Սլավիկ Հայրապետյանին եւ պարային զգույգին են ճանաչում: Մենք այսքանս ենք փորձում մեր ուժերով Հայաստանում առաջ տանել գեղասահքը: Եվ ես նորմալ եմ ընդունում այն փաստը, որ նույնիսկ հավասար միավորներով եթե 7-րդ՝ պահեստային տեղը կիսեմ որեւէ այլ երկրի ներկայացուցչի հետ, միանշանակ առավելությունը ինձ չեն տա:

Մրցաշրջանը վաղ ավարտելու մասին քո հայտարարությունը եղավ անմիջապես Rostelekom Cup-ից հետո:

Այն, որ ես որոշել էի ժամանակից շուտ ավարտել այս մրցաշրջանը, Գերմանիայի վարկանիշային մրցաշարից հետո էր: Այդ ժամանակ ես արդեն հստակ որոշել էի, որ ոչինչ չի ստացվում եւ ինձ դադար է պետք: Գերմանիայի մրցաշարից հետո երկար ժամանակ չէի սահում, սառույց դուրս չէի գալիս, երբ պատահական իմացա, որ Մոսկվայում կա եւս մեկ վարկանիշային մրցաշար: Գերմանիայի մրցաշարից հետո դեռեւս միայն ինքս ինձ համար էի մտածում, որ այդ մրցաշարով կավարտեմ մրցաշրջանը: Իսկ երբ իմացա եւս մեկ վարկանիշային մրացաշարի մասին, ուղղակի չէի կարող այն ձեռքիցս բաց թողնել: 12-րդ տեղի արդյունքը թերեւս սպասելի էր ինձ համար, քանի որ ես լիարժեք պատրաստ չէի պայքարի դուրս գալու, քանի որ վերջին 10 օրերի ընթացքում միայն տեղեկացա Rostelekom Cup-ի մասին եւ մրցումային ծրագրին չհասցրեցի պատշաճ պատրաստվել: Չնայած, նշեմ, որ Մոսկվայի մրցաշարում ես անհամեմատ լավ հանդես եկա, չկար լարվածություն, ինձ ավելի ազատ էի զգում, այնպես, ինչպես չէի զգացել ամբողջ մրցաշրջանի ընթացքում: Սա երեւի պայմանավորված էր նրանով, որ ես Մոկսվայում էի հանդես գալիս. ինչպես Երեւանը, Հայաստանը, այնպես էլ Մոսկվան, Ռուսաստանը ինձ համար տուն են, հարազատ քաղաքներ:

Ինչո՞ւ որոշեցիր հրաժարվել մրցաշրջանը ավարտին հասցնելուց: Օլիմպիական ուղեգիր չնվաճելու հիասթափությո՞ւնն է պատճառը:

Վերջին շրջանում մարզումների ընթացքում ինձ մոտ ամեն ինչ հրաշալի է ստացվում, իսկ երբ դուրս եմ գալիս սառույց, ամեն ինչ գլխիվայր շրջվում է՝ ոչ լիարժեք ցատկեր, պտույտներ, ամեն ինչ հակառակն է ստացվում: Որոշակի լարվածություն կար այս մրցաշրջանում, որն ինձ խանգարեց բոլոր մրցաշարերում: Կարծես ամեն ինչ անիմաստ լիներ: Պատճառներից մեկը հենց սա է, որ ես չկորցնեմ այն անունը եւ համբավը, որն այս տարիների ընթացքում ձեռք եմ բերել եւ վերցնեմ փոքրիկ դադար՝ նորովի ներկայանալու միտումով: Ես ուզում եմ, որ իմ որոշումը մարդիկ, երկրպագուները, մարզասերները ճիշտ հասկանան: Բայց միայն սա չի պատճառը, որ ես որոշել եմ դադար վերցնել. իրական պատճառը ֆինանսական խնդիրն է: Ես 18 տարեկան եմ, ուսանող եմ եւ այս շրջանում ունեմ ֆինանսական խնդիրներ: Ես կուզեի բացի մեծ սպորտում նվաճումների հասնելուց, նաեւ գումար աշխատել, ինձ, ընտանիքիս ապահովել, ծնողներիս օգնել: Սովորում եմ Ռուսաստանի Պլեխանովի անվան տնտեսագիտական համալսարանում, ծնողներս էլ այս շրջանում գումարի խնդիր ունեն: Ես արդեն հասուն տարիքում եմ եւ չեմ կարող այսպես երկար շարունակել զբաղվել միայն սպորտով, արդեն ժամանակն է, որ ես էլ գումար վաստակեմ: Ծնողներս այնքան բան են արել ինձ համար, եկել է ժամանակը, որ ես նրանց պատասխանեմ, օգնեմ, աջակցեմ գումարով:

Այս ընթացքում որոշել եմ մասնակցել շոու-ծրագրերի Մոսկվայում, գուցե այլ երկրներում, կկարողանամ գումար վաստակել:

Անաստասիա, իսկ հնարավո՞ր է, ավարտես մարզական կարիերադ եւ միայն շոուների մասնակցես, թե՞ ամեն դեպքում այս դադարը restart-ի համար է:

Այդ հարցն այժմ ինձ շատ են տալիս: Ոչ, ես չեմ ավարտում մարզական կարիեաս: Ես նորից եմ սկսում: Իմ հաջորդ start-ում կփորձեմ լինել լրիվ այլ Անաստասիա Գալուստյան: Ես շարունակելու եմ հանդես գալ Հայաստանի դրոշի ներքո, ես նոր պայքարի մեջ եմ մտնելու նոր օլիմպիական շրջափուլում: Այս դադարը չի նշանակում մարզական կարիերայի ավարտ, չի նշանակում, որ ես հեռանում եմ սառույցից, պայքարից: Հենց այդ պատճառով ցանկանում եմ իմ այս որոշմանն ըմբռնումով մոտենալ: Ես այս շրջանում պետք եմ իմ ընտանիքին, իմ հայրիկին եւ պետք է կարողանամ ֆինանսով ապահովել ընտանիքս, այդ թվում նաեւ ինձ: Անհրաժեշտ է գումար վաստակել, որպեսզի կարողանամ շարունակել մարզական կարիերաս:

Հայաստանում կանանց մենասահքի միակ առաջատարը դու ես հիմա: Որոշումդ ինչպե՞ս ընդունեց Հայաստանի գեղասահքի ֆեդերացիան:

Ֆեդերացիայի նախագահ Մելանյա Ստեփանյանն այդքան էլ լավ չընդունեց իմ որոշում: Նախքան իր հետ խոսելը, ինստագրամյան իմ գրառումն արդեն հասցրել էր հայտնվել համացանցում, եւ նա այնտեղից արդեն տեղեկացել էր: Նա, իհարկե, չհասկացավ, ինչ պատճառներ են ինձ դրդել նման որոշման համար: Մենք դեռ չհասցրեցին մանրամասն խոսել եւ հասկանալ միմյանց: Նա հասկացել էր, թե ես ավարտում եմ գեղասահորդի կարիերաս, դուրս եմ գալիս Հայաստանի հավաքականից: Ես շատ բարձր եմ գնահատում Մելանյա Ստեփանյանի աշխատանքը: Նա իսկապես ջանք չի խնայում հայկական գեղասահքը պատվով ներկայացնելու համար: Մենք մշտապես կապի մեջ ենք, նա պարբերաբար հետաքրքրվում է ինձանով, մեզանով, երբ մենք մարզումներն անում ենք տարրբեր քաղաքներում: Ես հույս ունեմ, որ նա ամեն ինչ կհասկանա, քանի որ դադարս երկար չի տեւելու: Հաջորդ մրցաշրջանի մեկնարկից ես կրկին կմիանամ հավաքականին:

Լուսինե Շահբազյան