Արմեն Գյոզալյան. Լավ աշխատանքի դեպքում Էդգար Ստեփանյանը կհասնի օլիմպիական ուղեգրի

Լավ աշխատանքի եւ նորմալ ֆինանսական ներդրումների դեպքում Էդգար Ստեփանյանը կհասնի օլիմպիական ուղեգրին:

Այս կարծիքը NEWS.am Sport-ի հետ զրույցում հայտնեց Հայաստանի առաջատար հեծանվորդ Էդգար Ստեփանյանի անձնական մարզիչ, հեծանվային սպորտի Հայաստանի հավաքականի նախկին գլխավոր մարզիչ Արմեն Գյոզալյանը, ում գլխավորությամբ Էդգար Ստեփանյանը հոկտեմբերի 18-22-ը Բեռլինում առաջին անգամ մասնակցեց հրապարակային հեծանվավազքի Եվրոպայի մեծահասակների առաջնությանը: Սկրեչ մրցաձեւոմ Ստեփանյանը մրցելույթներն ավարտեց 11-րդ տեղում եւ 4 կմ հետապնդումով վազքում՝ 18-րդ: Օմնիում մրցաձեւում Ստեփանյանին չհաջողվեց մտնել եզրափակիչ։

Պարոն Գյոզալյան, ամփոփեք Եվրոպայի առաջնությունը:

Մենք հանդես եկանք այնքան, որքան պատրաստվել էինք: Մի փոքր ավելի լավ կարող էր լինել, բայց այդ փոքրիկ հնարավորությունը, որը բաց թողեց Էդգարը, կփորձենք հետ բերել աշխարհի գավաթի խաղարկության առաջին փուլում: Սկրեչ մրցաձեւում 11-րդ տեղ գրավեց: Ես, որպես Էդգար Ստեփանին լավ ճանաչող մարդ, փաստում եմ, որ արեց ամեն ինչ, ավելի լավ մասնակցելու համար, բայց ավարտեց 11-րդ տեղի արդյունքով, որի համար գոհ եմ: Այս արդյունքով Ստեփանյանն իր վարկանիշային միավորները միանգամից 245-ով ավելացրեց: 4 կմ հետապնդումով վազքում ցույց տվեց 4։26 վայրկյան արդյունք, որն իր մարզական կարիերայի լավագույն արդյունքն էր: Մինչ այս,  նրա լավագույն արդյունքը 4:32 վայրկյան էր: Սա արդեն մեծ հույս է տալիս, որ մյուս կարեւոր վարկանիշային մրցաշարերում էլ ավելի բարձր միավորներ կվաստակենք եւ կկարողանանք աշխարհի առաջնության մասնակցության իրավունք ձեռք բերել:

Այս պահին Էդգար Ստեփանյանի վարկանիշային միավորները որքա՞ն են:

Աշխարհի առաջնության համար 459 միավոր ունենք: Մեր օլիմպիական ծրագիրը մեկնարկում է 2018 թվականի աշխարհի առաջնությունից հետո: Մենք այժմ անում ենք ամեն ինչ, որպեսզի առաջին անգամ, երկար տարիների դադարից հետո, աշխարհի մեծահասակների առաջնությունում Հայաստանի ներկայացուցիչ ունենանք: Իսկ նախորդ անգամ աշխարհի առաջնությունում ներկայացուցիչ ունեցել ենք 1995 թվականին: Արդեն աշխարհի առաջնությանը մասնակցելով՝ իրավունք ձեռք կբերենք օլիմպիական ծրագրում պայքարելու Տոկիո-2020 ուղեգրի համար: Պետք է ամեն ինչ անենք, որ կարողանանք աշխարհի առաջնությանը նորմալ միավորներով մասնակցության իրավունք ձեռք բերենք եւ մեր ամբողջ ուժերը ներդնենք արդեն աշխարհի առաջնությունում լավ հանդես գալու համար:

Եվրոպայի առաջնությանը մասնակցելու հնարավորություն ուներ միայն Էդգար Ստեփանյա՞նը:

Այն, որ այս պահին միայն Էդգար Ստեփանյանն էր պատրաստ Եվրոպայի առաջնությունում մեկնարկի դուրս գալ, որոշել է Հայաստանի հեծանվային սպորտի ֆեդերացիան եւ մարզչական շտաբը: Տարվա կտրվածքով լավագույն արդյունքները նրանն էին: Բացի այդ, քանի որ չէր թույլատրվում մրցաձեւերում երկու մարզիկ հայտարվորել, որոշվեց, որ Էդգարը հանդես կգա երկու մրցաձեւում: Միայն թույլատրվում էր երկու մարզիկ հայտավորել 4 կմ հետապնդումով մրցավազքում: Բայց այդ ձեւում էլ այս պահին չունեինք մարզիկ, որը Էդգարի չափ, կամ Էդգարից լավ արդյունք ցույց տար: Եթե մեր առաջատարներից Մհեր Մկրտչյանի ոտքի վնասվածքը չլիներ, նրան կհայտավորեինք խմբակային մրցավազքում: Ֆեդերացիան ամեն ինչ կաներ, կֆինանսավորեր, որ մենք երկու ներկայացուցիչով մասնակցենք: Իսկ Մհեր Մկրտչյանը դեռ մրցաշրջանի սկզբից վնասվածք ստացավ, փորձեց ուժերը Աֆրիկայի մրցաշարում, բայց այդքան լավ հանդես չեկավ: Այդ պատճառով ֆեդերացիան որոշեց, որ այս պահին միայն Էդգար Ստեփանյանն է պատրաստ Եվրոպայի առաջնությանը:

Այս տեմպերով Էդգար Ստեփանյանը կարո՞ղ է հասնել օլիմպիական ուղեգրին:

Ամեն ինչ էլ հնարավոր է. լավ աշխատանքի դեպքում եւ նորմալ ֆինանսներ ներդնելու դեպքում, բոլորիս համար այդքան բաղձալի օլիմպիական ուղեգիրը կարող ենք ձեռք բերել: Եվրոպայի առաջնությունում սկրեչ մրցաձեւում Էդգարից առաջ 10 մարզիկներն էլ Եվրոպայի, աշխարհի չեմպիոններ էին, բայց մեր հեծանվորդն այդ փաստից չընկճվեց եւ լավագույն արդյունքով հանդես եկավ: Նույն սկրեչ մրցաձեւում Էդգար Ստեփանյանը գերազանցեց աշխարհի չեմպիոն լեհ հեծանվորդին:

Էդգար Ստեփանյանը բնավորությամբ մարտիկ է, չի սիրում պարտվել: Նա լիարժեք գիտակցում է՝ ինչ մեծ պատասխանատվություն է իր վրա դրված, պատրաստ է օլիմպիական մրցաշրջանն անցնելու եւ պայքարելու օլիմպիական ուղեգրի համար: Էդգարի անունից ինձ թույլ կտամ ասել, որ պատրաստ է ցանկացած բարդություն հաղթահարել եւ բոլորիս ու իր երազանքն իրականացնել: 

Առաջիկայում ի՞նչ մրցաշարերի եք պատրաստվում:

Հոկտեմբերի 30-ին մեկնում ենք Լեհաստան, որտեղ կայանալու է աշխարհի գավաթի խաղարկության առաջին փուլը: Շատ կարեւոր է աշխարհի գավաթի առաջին փուլի արդյունքը, որից հետո վերջնական պարզ կլինեն մեր հնարավորությունները: Աշխարհի գավաթի խաղարկության 2-րդ փուլը կայանալու է Անգլիայում, բայց վիզաները չհասցրեցինք եւ, ստիպված բաց ենք թողնելու 2-րդ փուլը: Հույսներս 3-րդ եւ 4-րդ փուլերն են, որոնք կայանալու են Կանադայում եւ Չիլիում: Ֆինանսական խնդիր չունենք: Ֆեդերացիան հնարավոր ամեն բան անում է, որ 2018 թվականի աշխարհի առաջնության վարկանիշային միավորներ տվող բոլոր մրցաշարերին մասնակցենք: Նաեւ հավաքներ ենք ունենում, մարզումային գործընթացը լիարեժ կազմակերպվում է: Մնում է՝ այսպես շարունակական մնա ֆեդերացիայի աջակցությունը:

Լուսինե Շահբազյան