Մարկոս Պիզելի. Չենք կարող ամեն անգամ մեղադրել միայն Մխիթարյանին
15:34 10 հոկտեմբերի, 2017Ֆուտբոլի Հայաստանի ազգային հավաքականի կիսապաշտպան Մարկոս Պիզելին աշխարհի առաջնության ընտրական փուլի վերջին տուրում ղազախների հետ արտագնա ոչ ոքիից հետո ամփոփել է ընտրական մրցաշարը:
«Ցավոք, մեզ չի հաջողվում նույն մակարդակով խաղալ 90 րոպե: Ինձ մեղավոր եմ զգում մեր ցուցադրած արդյունքների համար: Պետք է նույն մակարդակով խաղանք 90 րոպե, եւ կարեւոր չէ՝ մրցակիցը Ղազախստանն է, թե Լեհաստանը:
Այս ընտրական փուլը մեզ համար հեռու էր լավագույնը լինելուց: Մենք վատ էինք խաղում, եւ դա ունի իր պատճառները: Չենք կարող ամեն անգամ միայն Մխիթարյանին մեղադրել նրա համար, որ նա խաղն իր վրա չէր վերցնում: Պետք է ճիշտ հետեւություններ անել առաջ շարժվելու համար:
Ղազախստանի հավաքականի դեմ խաղում ունեցանք շանսեր, սակայն մրցակիցը մեզ չէր զիջում հաղթանակի հասնելու ցանկությամբ: Սա առաջին դեպքը չէ, երբ մենք հրաշալի ենք սկսում խաղը, սակայն հետո անկում է լինում եւ մենք կորցնում ենք առավելությունը: Մասնավորապես, դա կարելի է կապել մեր ֆուտբոլիստների անհատական վարպետության հետ: Միջազգային խաղերում արագություններն այլ են, եւ դրան հարմարվելը հեշտ չէ:
Ինչ վերաբերում է իմ՝ Ղազախսատնի առաջնություն վերադառնալուն, ապա՝ երբեք մի ասա երբեք: Ես հրաշալի հարաբերություններ ունեմ Ղազախստանի հավաքականի խաղացողների հետ եւ ուրախ էի ընկերներիս հանդիպելու համար: Այդ պատճառով ամեն բան հնարավոր է, սակայն հիմա դա անելը բարդ կլինի: Ժամանակն առաջ է շարժվում, իսկ ես մեծանում եմ»,- Սաուդյան Արաբիայի «Ալ Շաբաբ» թիմի 33-ամյա ֆուտբոլիստի խոսքը մեջբերում է KazFootball.kz-ը:
Հիշեցնենք, որ Աստանայի «Աստանա Արենա» ստադիոնում կայացած Ղազախստան – Հայաստան խաղն ավարտվել էր 1:1 հաշվով: «Մանչեսթեր Յունայթեդի» կիսապաշտպան Հենրիխ Մխիթարյանի՝ առաջին խաղակեսում խփած գոլին ղազախները պատասխանել էին ընդմիջումից հետո:
© 2026 NEWS.am - Sport
The copyright for information published on this web site is owned exclusively by Armenian News-NEWS.am information-analytical agency. All information materials published on this website are intended solely for personal use. For full or partial reproduction of any material in other media it is required to acquire written permission from Armenian News-NEWS.am information-analytical agency. Those, who have committed copyright violations, will be prosecuted accordingly.