Ռուսլան Կորյան. Եթե միշտ հույսներս դնենք միայն Մխիթարյանի վրա, ոչ մի լավ բան չի ստացվի

Ֆուտբոլի Հայաստանի հավաքականի եւ ռուսական «ԲՄԱ Խաբարովսկի» հարձակվող Ռուսլան Կորյանը Ատանայում կայացած նախախաղային ասուլիսում խոսել է ղազախների դեմ աշխարհի առաջնության ընտրական փուլի վերջին տուրի խաղի մասին:

«Թռիչքը նորմալ անցավ: Անձամբ ես քնել եմ ամբողջ 3 ժամվա ընթացքում, երբ մենք ինքնաթիռի մեջ էինք: Վերականգնվելու մասին կասեմ, որ բոլորս մարտական ենք տրամադրված Լեհաստանի դեմ խաղում տեղի ունեցածից հետո: Չեմ կարծում, որ հոգեբանորեն կարելի է շատ արագ մոռանալ այդ պարտությունը: Մեզ համար առաջիկա խաղը լավ հնարավորություն է մի փոքր մեղմել մեր մեղքը տեղի ունեցածից հետո:

Կարծում եմ՝ վաղը լինելու է հավասար թիմերի խաղ, որում առաջին տեղում կլինի նվիրումը եւ հաղթելու ցանկությունը: Դատելով Ղազախստանի հավաքականի խաղից՝ ինչ-որ տեղ կարող է չբավականացնել վարպետությունը, բայց ձեր թիմը միշտ դաշտում ներդնում է բոլոր ուժերը:

Միանշանակ, Հենրիխ Մխիթարյանի ներկայությունը դաշտում մեծ առավելություն է մեզ համար: Նա մեր առաջատարն է: Սակայն, միեւնույն ժամանակ, եթե միշտ հույսներս դնենք միայն նրա վրա, ոչ մի լավ բան չի ստացվի: Ֆուտբոլը թիմային խաղ է:

Անձամբ ինձ համար արհեստական խոտածածկով խաղադաշտում խաղալը նորություն չէ, քանի որ մեր առաջնությունում դաշտերից շատերն այդպիսին են: Ես սովոր եմ դրան: Վաղվա խաղում ոչ ոքին չի բավարարի մեզ:

Լեհաստանի դեմ խաղից հետո ես արդեն ներողություն եմ խնդրել հայ երկրպագուներից, իսկ հիմա ցանկանում եմ, որ նրանք շարունակեն աջակցել մեզ. դա շատ կարեւոր է մեզ համար»,- Կորյանի խոսքը փոխանցում է KazFootball.kz-ը:

Հիշեցնենք, որ Ղազախստան - Հայաստան խաղը կկայանա հոկտեմբերի 8-ին  Աստանայի «Աստանա Արենա» ստադիոնում եւ կսկսվի Երեւանի ժամանակով 20:00-ին:

Հիշեցնենք, որ առաջին շրջանում Հայաստանի հավաքականը ղազախներին հաղթել է 2:0 հաշվով: 2 թիմերն էլ զրկվել են ԱԱ-2018-ի եզրափակիչ մրցաշարի ուղեգիր նվաճելու հնարավորությունից: Վերջին տուրից առաջ E խմբի առաջատար Լեհաստանի հավաքականն ունի 22 միավոր, Դանիան՝ 19, Չեռնոգորիան՝ 16, Ռումինիան՝ 12, Հայաստանը՝ 6, իսկ Ղազախստանը՝ 2: