11:12 30 սեպտեմբերի, 2017Փորձում եմ հայկական բռնցքամարտի ձեռագիրը հետ բերել, ամբողջ աշխարհին ցուցադրել թե պրոֆեսիոնալ, թե սիրողական բռնցքամարտում: Դա այն ձեռագիրն է, որը չգիտես ինչու վերջին տարիներին ուղղակի խամրել էր:
Այս մասին NEWS.am Sport-ի թղթակցի հետ զրույցում ասաց բռնցքամարտի տղամարդկանց Հայաստանի հավաքականի գլխավոր մարզիչ, պրոֆեսիոնալ ռինգում հայ բռնցքամարտիկների մարտավկա Դավիթ Թորոսյանը:
Սեպտեմբերի 30-ին Մոսկվայում երեք հայ բռնցքամարտիկներ հերթական անգամ ուժերը կփորձեն պրոֆեսիոնալ ռինգում: Մոսկովյան Punchboxing promoutions-ի կազմակերպած երեկոյին Հայաստանից կմասնակցեն Նարեկ Աբգարյանը, Արամ Ավագյանը եւ Գոռ Երիցյանը: Երեք բռնցքամարտիկների մրցակիցներն էլ այս անգամ պրոֆեսիոնալ ռինգում կլինեն ուկրաինացիներ:
«Ակնկալիքներս միայն հաղթանակ է: Հույս ունեմ եւ վստահ եմ, որ երեքն էլ հաղթանակով են վերադառնալու հայրենիք: Իհարկե, պարտվելն էլ չի բացառվում, բայց մենք այնպիսի մարզումային փուլ ենք անցել, որ վստահ կարող եմ ասել՝ երեքն էլ լավ մարզավիճակում են: Բայց կարծում եմ շատ գեղեցիկ հաղթանակներ ենք ունենալու՝ նոկաուտներով:
Պրոֆեսիոնալ ռինգն ուրիշ աշխարհ է, ուրիշ դռներ է բացում բռնցքամարտիկի համար: Այստեղ բոլորովին այլ բռնցքամարտ է, ամեն ինչ ուրիշ է, ուրիշ գույների եւ ընթացքի մեջ, մոտեցումներն են լրիվ այլ: Այս ամենը կհասկանան նրանք, ովքեր գոնե մեկ անգամ փորձել են իրենց ուժերը պրոֆեսիոնալ ռինգում: Իսկ մյուսները այդքան էլ չեն հասկանա՝ ինչ եմ ասում: Հայ բռնցքամարտիկներն իրենց լավ են զգում պրոֆեսիոնալ ռինգում: Գուցե ավելի լավ, քան սիրողականում»,- ասաց Դավիթ Թորոսյանը:
Հարցին, հնարավոր է պրոֆեսիոնալ ռինգում հաջողություններ գրանցելուց հետո նախկին օլիմպիականները կրկին փորձեն ուժերը օլիմպիական ռինգում՝ Տոկիո 2020-ում, Դավիթ Թորոսյան չբացառեց:
«Ըստ ԱԻԲԱ-ի օրենքների պրոֆեսիոնալ ռինգում 15 մենամարտը չգերազանցած բռնցքամարտիկը հնարավորություն ունի ուժերը չափել Օլիմպիական խաղերում: Այս իմաստով չի բացառվում, որ մեր այս տղաներից ոմանք կամ մեկը Տոկիոյի օլիմպիական հավաքականում լինի: Ցանկալի կլինի, բայց չեմ կարծում, որ մինչեւ Օլիմպիական խաղեր, օրինակ՝ Նարեկ Աբգարյանը 15-ից պակաս մենամարտեր արած լինի»,- նշեց Դավիթ Թորոսյանը:
Եվրոպայի մինչեւ 22 տարեկանների բրոնզե մեդալակիր, Ռիո-2016-ի մասնակից, Հայաստանի հավաքականի 52 կգ քաշային արդեն նախկին անդամ Նարեկ Աբգարյանը 6-րդ անգամ է դուրս գալիս պրոֆեսիոնալ ռինգ: Նախկին 5 մենամարտերում միայն հաղթանակներով է ավարտել:
«Լավ եմ պատրաստվել 6-րդ մենամարտիս: Մարզումային փուլի ընթացքում մի փոքր հոգնածություն ունեմ, բայց ռինգում ինձ շատ լավ եմ զգում, բռնցամարտ անելուց հասկանում եմ, որ լիարժեք պատրաստ եմ դուրս գալու ռինգ:
Մարզումների ընթացքում քաշս կարգավորեցի: Հանդես կգամ 55,5 կգ քաշային կարգում: Մրցակցիս արդեն ուսումնասիրել եմ: Գիտեմ՝ ինչ ոճի մարզիկ է, ինչպես է վարում իր մենամարտերը:
Պրոֆեսիոնալ ռինգում ինձ լավ եմ զգում: Վստահ եմ զգում: Ավելի հարմար եմ զգում երկար ռաունդներով մենանարտեր անելուց: Ուրախ եմ, որ նախկին 5 պոֆեսիոնալ մենամարտերում հաղթանակ եմ տոնել: Ամեն ինչ կանեմ, որ 6-րդն էլ հաղթանակով ավարտեմ»,- նշեց Նարեկ Աբգարյանը:
Եվրոպայի բրոնզե մեդալակիր, Ռիո-2016-ի օլիմպիական, Հայաստանի հավաքականի 56 կգ քաշային կարգի արդեն նախկին ներկայացուցիչ Արամ Ավագյանի համար մոսկովյան երեկոն կլինի 5-րդ մենամարտը պրոֆեսիոնալ ռինգում (4 հաղթանակ):
«Արդեն 5-րդ անգամ ուժերս չափում եմ պրոֆեսիոնալ ռինգում: Երկար մարզումային փուլ եմ անցել: Աստիճանաբար մարզիչի հետ միասին հասանք մեր ուզած մարզավիճակին: Պատրաստ եմ ռինգ դուրս գալուն: Ինձ շատ լավ եմ զգում պրոֆեսիոնալ ռինգում: Գուցե շատ ավելի լավ, քան սիրողականում: Այստեղ մոտեցումն այլ է: Ինչպես ասում են՝ պրոֆեսիոնալ ռինգում զգում եմ ինձ, ինչպես տանը: Մրցակիցս թույլ բռցնքամարտիկ չէ: Պրոֆեսիոնալ ռինգում ունի 9 մենամարտ՝ 4 հաղթանակ, 4 պարտություն, 1 ոչ-ոքի: Ես իմ մրցակիցներին երբեք չեմ թերագնահատում եւ ոչ էլ գերագնահատում եմ. եթե մարդ բռնցքամարտի մեջ է, ուրեմն բնռցքամարտիկ է եւ հարված անել գիտի: Թե ինչ կլինի սեպտեմբերի 30-ին, ռինգը ցույց կտա»,- ասաց Արամ Ավագյանը:
Գոռ Երիցյանը երրորդ անգամ է ուժերը փորձում պրոֆեսիոնալ ռինգում: Առաջին երկու մենամարտերն ավարտել է հաղթանակով՝ նոկաուտով: Հույս ունի, որ 3-րդ մենամարտն էլ նոկաուտով կհաղթի:
«Պատրաստ եմ պայքարի: Շատ լավ եմ պատրաստվել: Լավ ճանապարհ ենք անցել Դավիթ Թորոսյանի հետ: Ֆիզիկականի վրա մեծ աշխատանք են տարել, տեխնիկայի վրա շատ ենք աշխատել: Երեքիս մրցակիցներն էլ փորձառու բռնցքամարտիկներ են: Դուրս ենք գալու ռինգ հաղթելու: Հուսամ ամեն ինչ հաջող կընթանա:
Պրոֆեսիոնալ ռինգում ես նույնպես ինձ շատ լավ եմ զգում: Հասկանում եմ, որ բռնցքամարտում ես վերջապես գտել եմ ինձ: Երրորդ փորձս է լինելու եւ ամեն ինչ անելու եմ, որ 3-րդ հաղթանակս լինի: Պրոֆեսիոնալ բռնցքամարտում արդեն ունեմ իմ նպատակները»,- ասաց Գոռ Երիցյանը:
Լուսինե Շահբազյան
The copyright for information published on this web site is owned exclusively by Armenian News-NEWS.am information-analytical agency. All information materials published on this website are intended solely for personal use. For full or partial reproduction of any material in other media it is required to acquire written permission from Armenian News-NEWS.am information-analytical agency. Those, who have committed copyright violations, will be prosecuted accordingly.