Թբիլիսիում ընթացող շախմատի աշխարհի գավաթի խաղարկությունում հայկական շախմատի առաջատար Լեւոն Արոնյանը դուրս եկավ 1/8 եզրափակիչ՝ թայ-բրեյքում հաղթահարելով ռուսաստանցի Մաքսիմ Մատլակովի արգելքը՝ 5:3:
5+3 րոպե խաղաժամանակով երկու պարտիաներում հայ գրոսմայստերը հաղթեց 2:0 հաշվով:
Լեւոն Արոնյանը 10+10 րոպե խաղաժամանակով պարտիաներում չէր կարողացել առավելության հասնել: Առաջին պարտիայում Լեւոն Արոնյանը հաղթանակ էր տարել սպիտակներով, իսկ պատասխան պարտիայում պարտվել սեւերով:
Թայ-բրեյքում արագ խաղի երկու պարտիաներում էլ գրանցվել էր ոչ ոքի:
Առաջին երկու դասական պարտիաներում Լեւոն Արոնյանը հաղթանակից հետո երկրորդ պարտիայում պարտություն էր կրել:
Հայ գրոսմայստերի հաջորդ մրցակիցը ռուսաստանցի Վլադիսլավ Դուբովն է:
Աշխարհի գավաթի խաղարկության եզրափակիչի մասնակիցները կստանան 2018թ. մարտին Բեռլինում անցկացվելիք աշխարհի չեմպիոնի հավակնորդների մրցաշարի ուղեգրեր:
Աշխարհի չեմպիոն, նորվեգացի Մագնուս Կարլսենը աշխարհի գավաթի խաղարկության երրորդ շրջանում 0.5:1.5 հաշվով պարտվել է չինացի Բու Սիանձիին եւ դուրս մնացել պայքարից:
Սույն կայքում տեղ գտած լրատվական հրապարակումների հեղինակային իրավունքը պատկանում է բացառապես NEWS.am լրատվական-վերլուծական գործակալությանը։Սույն կայքի բոլոր լրատվական հրապարակումները անհատական օգտագործման համար են։ Տեղեկատվություն տարածող այլ միջոցներում սույն կայքի հրապարակումների (մասնակի կամ ամբողջական) վերահրապարկման համար անհրաժեշտ է NEWS.am լրատվական-վերլուծական գործակալության գրավոր թույլտվությունը։Խախտում թույլ տված անձինք կենթարկվեն պատասխանատվության օրենքով սահմանված կարգով։