Սամվել Գեւորգյան. Միհրան Հարությունյանը կհամատեղի խառը մենամարտերն ու ըմբշամարտը

16:53   6 սեպտեմբերի, 2017

Միհրան Հարությունյանը չի ավարտում ըմբիշի կարիերան։ Կսկսի հանդես գալ խառը մենամարտերում՝ համատեղ հանդես գալով նաեւ հունահռոմեական ըմբշամարտի Հայաստանի հավաքականում։

Այս մասին NEWS.am Sport-ի թղթակցի հետ զրույցում ասաց հունահռոմեական ըմբշամարտի Հայաստանի հավաքականի մարզիչ, Ռիո-2016-ի Օլիմպիական խաղերի փոխչեմպիոն Միհրան Հարությունայնի անձնական մարզիչը Հայաստանում Սամվել Գեւորգյանը։

Հիշեցնենք, որ ԱՄՆ-ում աշխատող ММА-ի հայտնի մենեջեր Ռիզվան Մագոմեդովը Ինստագրամում գրել է, որ Ռիո-2016-ի օլիմպիական փոխչեմպիոն, հունահռոմեական ըմբշամարտի Հայաստանի հավաքականի առաջատարներից Միհրան Հարությունյանը ուժերը փորձելու է խառը մենամարտերում (ММА): Հրապարակումը սոցցանցերում տարածել է նաեւ Միհրան Հարությունյանը, որն այս օրերին ամուսնական մեղրամիսն է վայելում։ 

«Միհրան Հարությունյանը չի հեռանում ըմբշամարտից։ Մեր չեմպիոնը նոր եւ շատ լավ առաջարկ է ստացել՝ իր ուժերը փորձելու նաեւ խառը մենամարտերում։ Միհրանը սիրով համաձայնել է եւ վստահ ենք, որ մեծ հաջողությունների կհասնի նաեւ MMA-ում։ Իսկ ըմբիշի իր կարիերան կշարունակի՝ համատեղելով։ Այս շրջանում Միհրան Հարությունյանը հանգստանում է։ Ձեռքի լիարժեք ապաքինումից հետո ըմբիշը կվերսկսի մարզումները»,-ասաց Սամվել Գեւորգյանը։ 

Հիշեցնենք, որ  Միհրան Հարությունյանն ըմբշամարտի մրցագորգից բացակայում է Օլիմպիական խաղերից հետո: Ռիո-2016-ում նա հանդես էր եկել ուսի վնասվածքով, իսկ եզրափակիչում խայտառակ կողմնակալ մրցավարության պատճառով զրկվել ոսկե մեդալից։ Դրանից հետո հայ ըմբիշը 2 վիրահատության է ենթարկվել Գերմանիայում եւ Լեհաստանում:

NEWS.am Sport-ի թղթակցի հետ զրույցում Միհրան Հարությունյանը տեղեկացրել էր, որ ամուսնությունից հետո, սեպտեմբերին եւս մեկ անգակ կվիրահատվի, իսկ 6 ամիս անց արդեն լիարժեք կվերսկսի մարզումները։

Լուսինե Շահբազյան



© 2022 NEWS.am - Sport

Սույն կայքում տեղ գտած լրատվական հրապարակումների հեղինակային իրավունքը պատկանում է բացառապես NEWS.am լրատվական-վերլուծական գործակալությանը։Սույն կայքի բոլոր լրատվական հրապարակումները անհատական օգտագործման համար են։ Տեղեկատվություն տարածող այլ միջոցներում սույն կայքի հրապարակումների (մասնակի կամ ամբողջական) վերահրապարկման համար անհրաժեշտ է NEWS.am լրատվական-վերլուծական գործակալության գրավոր թույլտվությունը։Խախտում թույլ տված անձինք կենթարկվեն պատասխանատվության օրենքով սահմանված կարգով։