Ռումինիա - Հայաստան. Մարզիչների կարծիքները

Հայաստանի եւ Ռումինիայի հավաքականների միջեւ ֆուտբոլի աշխարհի 2018թ. առաջնության ընտրական փուլի եվրոպական գոտու մրցաշարի 7-րդ տուրի խաղից հետո 2 թիմերի գլխավոր մարզիչները հետխաղյա ասուլիսում կիսվել են տպավորություններով:

Արթուր Պետրոսյան (Հայաստան). «Մինչեւ կարմիր քարտը ստացվեց այն, ինչ ծրագրել էինք։ Մեր կիսադաշտում հաճախ էինք գնդակ կորցնում, բայց մինչեւ հեռացումը մեր մարտավարությունը գործում էր։ Կարծում եմ՝ վերջնամասում բաց թողած գոլը հոգնածության հետեւանք էր։ Տղաները պայքարեցին մինչեւ վերջ, իսկ գոլից հետո փորձում էին փրկել խաղը։ Արժանի էինք մեկ միավոր վաստակելուն։ Եթե իրացնեինք մեր պահերը, այլ խաղ կստացվեր։

Պետք չէ հիասթափվել: Անհրաժեշտ է վերականգվել մինչեւ Դանիայի դեմ խաղը: Ռումինիայի հետ հանդիպման առաջին խաղակեսում ցուցադրած մեր խաղը պետք է կրկնենք Դանիայի հետ հանդիպման 90 րոպեներին»:

Քրիստոֆ Դաում (Ռումինիա). «Ստացվեց շատ բարդ հանդիպում, հատկապես՝ առաջին խաղակեսը: Մրցակիցը խաղում էր 5 պաշտպաններով, որոնց օգնում էին նաեւ կիսապաշտպանները: Երկրորդ խաղակեսում մենք ունեցանք մի շարք գոլային պահեր եւ կարողացանք հաղթանակ կորզել: Հրաշալի էր, որ թիմը պայքարեց մինչեւ վերջ: Հանդիպումն ավարտվում է միայն մրցավարի եզրափակիչ սուլիչից հետո: Կարող եք հիշել «Մանչեսթեր Յունայթեդի» եւ «Բավարիայի» միջեւ Չեմպիոնների լիգայի եզրափակիչը, որում 2 գոլ գրանցվեց ավելացված ժամանակում:

Չեմ ցանկանում առանձնացնել որեւէ խաղացողի: Մեր թիմը կազմավորման փուլում է: Այս հաղթանակը լավ նշան է, որ մենք աճել ենք: Ցանկանում էինք պահպանել աշխարհի առաջնության ուղեգիր նվաճելու շանսերը: Չեմ ասի, որ 100 տոկոսով գոհ եմ, բայց ես քայլ առաջ եմ կատարել: Կարեւոր չէ, որ շատերը պահանջում էին իմ հրաժարականը: Ես կարող եմ դիմանալ մեծ ճնշմանը: Ցանկանում եմ մնալ այս պաշտոնում», փոխանցում է Sport.ro-ն:

Հիշեցնենք, որ Բուխարեստի «Արենա Նացիոնալա» ստադիոնում կայացած խաղում Հայաստանի հավաքականը նվազագույն հաշվով պարտվեց ռումինացիներին, որոնք հաղթական գոլը խփեցին ավելացված ժամանակում: Արթուր Պետրոսյանի թիմը 54-րդ րոպեից խաղում էր 10 խաղացողներով, իսկ դաշտի տերերը Տարոն Ոսկանյանի կարմիր քարտից հետո նաեւ վրիպել էին 11 մետրանոցից: