Մաքսիմ Մանուկյանի մայր. Ներքուստ զգում էի եւ հավատում, որ որդիս հաղթանակով է վերադառնալու (live՝ «Զվարթնոցից»)
15:56 23 օգոստոսի, 2017Երեւանի «Զվարթնոց» օդանավակայանի ժամանման սրահում հայ մարզասեր երկրպագուները արդեն մի քանի ժամ սպասում են հունահռոմեական ըմբշամարտի աշխարհի չեմպիոններ Արթուր Ալեքսանյանին եւ Մաքսիմ Մանուկյանին:
Հունահռոմեական ըմբշամարտի Հայաստանի հավաքականը օգոստոսի 23-ին վերադառնում է հայրենիք: NEWS.am Sport-ը ֆեյսբուքյան հեռարձակմամբ ներկայացնում է դիմավորումը «Զվարթնոցում»:
Չեմպիոններին դիմավորողներից սպասասրահում ամենահուզվածը Մաքսիմ Մանուկյանի մայրն էր՝ տիկին Սվետան, ով փորձում էր հնարավորինս աննկատ մնալ բազմության մեջ:
NEWS.am Sport-ի թղթակցի հետ զրույցում Մաքսիմ Մանուկյանի մայրը պատմեց, որ միշտ հավատացել է որդու հաղթանակին:
«Աննկարագրելի հուզված եմ, լարված: Այս զգացողությունը դեռ երեկվանից է: Անչափ երջանիկ եմ, որ չեմպիոնի մայր եմ: Մաքսիմ Մանուկյանն իրականացրեց իր հոր երազանքը, եւ ես երջանիկ եմ:
Ես ուզում եմ, որ Հայաստանի, աշխարհի բոլոր մարզիկների մայրերը ապրեն այս զգացողությունները, ինչ ես ապրեցի երեկ եւ այսօր արթնացա, որպես չեմպիոնի մայր:
Գոտեմարտերին չեմ հետեւել: Սովորաբար չեմ հետեւում, քանի որ շատ ծանր է ինձ համար: Բայց ներքուստ զգում էի եւ հավատում, որ իմ որդին հաղթանակով է գալու տուն»,- ասաց Մաքսիմ Մանուկյանի մայրը:
Հիշեցնենք, որ 30-ամյա ըմբիշը նախկինում մեդալներ չէր նվաճել մեծահասակների աշխարհի եւ Եվրոպայի առաջնություններում:
Լուսինե Շահբազյան
Լուսանկարը՝ Էմմա Ասատրյանի
© 2026 NEWS.am - Sport
The copyright for information published on this web site is owned exclusively by Armenian News-NEWS.am information-analytical agency. All information materials published on this website are intended solely for personal use. For full or partial reproduction of any material in other media it is required to acquire written permission from Armenian News-NEWS.am information-analytical agency. Those, who have committed copyright violations, will be prosecuted accordingly.