«Մանչեսթեր Սիթի» - «Էվերտոն»՝ 1:1. Ռունիի 200-րդ գոլը Պրեմյեր լիգայում

Անգլիայի առաջնության երկրորդ տուրի վերջին խաղում «Մանչեսթեր Սիթին» ընդունեց Լիվերպուլի «Էվերտոնին» եւ բավարարվեց ոչ ոքի արդյունքով՝ 1:1:

Հանդիպման հաշիվը 35-րդ րոպեին բացեց «Մանչեսթեր Յունայթեդից» «Էվերտոն» վերադարձած Ուեյն Ռունին: Անգլիացի հարձակվողը 200-րդ գոլը խփեց Անգլիայի Պրեմյեր լիգայում: Ռունին «Մանչեսթեր Սիթիին» է խփել նաեւ իր 50-րդ եւ 150-րդ գոլերը Պրեմյեր լիգայում: Ավելի շատ գոլ անգլիական Պրեմյեր լիգայում խփել է միայն Ալան Շիրերը՝ 260 գոլ:

44-րդ րոպեից կատալոնացի Խոսեպ Գվարդիոլայի գլխավորած թիմը հանդես էր գալիս 10 ֆուտբոլիստներով: Երկրորդ դեղին քարտի համար հեռացվեց անգլիացի պաշտպան Կայլ Ուոլքերը:

82-րդ րոպեին անգլիացի հարձակողական կիսապաշտպան Ռահիմ Ստերլինգի խփած գոլի շնորհիվ դաշտի տերերը կարողացան խուսափել պարտությունից:

88-րդ րոպեին հեռացում եղան նաեւ հյուրերի կազմում: Երկրորդ դեղին քարտը ստացավ ֆրանսիացի կիսապաշտպան Մորգան Շնեյդերլենը:

«Մանչեսթեր Սիթին» ու «Էվերտոնն» ունեն 4-ական միավոր: Նույնքան վաստակել են նաեւ «Ուոթֆորդը», «Լիվերպուլն» ու «Սաութհեմփթոնը»:

Առաջատարներն են «Մանչեսթեր Յունայթեդը», «Հադերսֆիլդն» ու «Վեստ Բրոմվիչը»՝ 6-ական միավոր:

Անգլիայի առաջնություն, երկրորդ տուր

«Մանչեսթեր Սիթի» - «Էվերտոն»՝ 1:1

Ռահիմ Ստերլինգ, 82 - Ուեյն Ռունի, 35

Հեռացումներ՝ Կայլ Ուոլքեր, 44, երկրորդ դեղին քարտ - Մորգան Շնեյդերլեն, 88, երկրորդ դեղին քարտ