Երեւանում տեղի ունեցավ «Արցախ» ֆուտբոլային ակումբի շնորհանդեսը (NEWS.am Sport Live)
18:34 1 օգոստոսի, 2017Երեւանի նախկին «Միկա» մարզահամալիրում տեղի ունեցավ նորաստեղծ «Արցախ» ֆուտբոլայյին ակումբի շնորհանդեսը: Այս մասին փոխանցում է NEWS.am Sport-ի թղթակիցը:
Ակումբի հիմնադիրը ծնունդով Արցախից Սեւան Ասլանյանն է, որը բնակվում է Չեխիայում:
Ակումբն ունի 22 ֆուտբոլիստ: Նրանցից 5-ը Արցախի Հանրապետությունից են: Գլխավոր մարզիչը Տիգրան Եսայանն է: Շնորհանդեսի ընթացքում ներկայացվեց «Արցախի» ֆուտբոլիստների համազգեստը: Թիմն արդեն ունի տնային, արտագնա հանդիպումների մարզահագուստներ, ինչպես նաեւ առանձին մարզումային համազգեստ: Շնորհանդեսի ընթացքում ներկայացվեց նաեւ ակումբի հիմնը:
«Ունենք լավ ընտրված ֆուտբոլիստներ եւ մեծ նպատակներ: Խնդիր է դրված թիմն առաջին տեղով դուրս բերել Բարձրագույն խումբ: Ունենք համապատսխան կազմ, եւ կարծում եմ՝ մեր առջեւ դրված խնդիրը կլուծենք: Խաղալու ենք բալանսավորված ֆուտբոլ՝ պետք է եւ լավ հարձակվենք, եւ լավ պաշտպանվենք: Մեր ակումբը մյուս ակումբներից տաբերվելու է ֆուտբոլիստներով եւ գրագետ խաղով:
Ակումբը սերտ կապ է ունենալու Արցախի ֆուտբոլի դպրոցի հետ, արդեն ունենք 5 ֆուտբոլիստ այնտեղից:
Գիտեմ, որ Առաջին լիգայում եւս երկու նոր թիմեր են հանդես գալու՝ «Լոռին» եւ «Ավան Ակադեմիան»: «Ավանի հետ արդեն խաղ ունեցել ենք, բայց «Լոռիին» ծանոթ չենք: Գիտեմ, որ լավ թիմ է: Կարծում եմ՝ նոր թիմերը խնդիր չեն լինի մեզ համար եւ կաշխատենք առաջին տեղով դուրս գալ:
Թիմի նախապատրաստական փուլն անցել է շատ լավ, մարզադաշտի, մարզագույքի հետ կապված խնդիրներ չենք ունեցել: Ինչ խաղեր, որ ծրագրել էինք, նորմալ անցել է»,- ասաց Տիգրան Եսայանը:
Գլխավոր մարզչի փոխանցմամբ, «Արցախի» տնային խաղերն անցկացնելու են նախկին «Միկա» ստադիոնում:
«Հայաստանում հաճախակի են նոր ակումբներ բացվում, գեղեցիկ ներկայացվում եւ նույն արագությամբ էլ փակվում: Մենք կանենք հնարավորը, որ «Արցախը» երկար կյանք ունենա: Ակնկալում ենք երկրպագուների աջակցությունը եւ հույս ունենք, որ մեր հանդիպումները կանցնեն լի տրիբունաներով, քանի որ եթե թիմը լավ խաղ ցույց տա, երկրպագուները կգան»,- նշեց մարզիչը
Շնորհանդեսից հետո «Արցախ» ակումբ ստուգողական խաղ կանցկացնի «Էրեբունի» թիմի հետ, որը կլինի վերջին հանդիպումը առաջնության մեկնարկից առաջ:
Լուսինե Շահբազյան
© 2026 NEWS.am - Sport
The copyright for information published on this web site is owned exclusively by Armenian News-NEWS.am information-analytical agency. All information materials published on this website are intended solely for personal use. For full or partial reproduction of any material in other media it is required to acquire written permission from Armenian News-NEWS.am information-analytical agency. Those, who have committed copyright violations, will be prosecuted accordingly.