Ռոման Ամոյան. Սպորտից չեմ հեռացել, ըմբշամարտը իմ կյանքն է

10:43   21 հունիսի, 2017

Լինում են պահեր, որ ուզում եմ պաշտոնական հագուստը հանել, հագնել տրիկոն եւ գորգ դուրս գալ:

NEWS.am Sport-ի թղթակցի հետ զրույցում մարզադահլիճում գտնվելու ընթացքում այսպես իր ապրումները նկարագրեց Պեկին-2008-ի Օլիմպիական խաղերի բրոնզե մեդալակիր, աշխարհի փոխչեմպիոն, աշխարհի առաջնության կրկնակի բրոնզե մեդալակիր,  Եվրոպայի կրկնակի չեմպիոն, քառակի փոխչեմպիոն, հունահռոմեական ըմբիշ Ռոման Ամոյանը, ով 2017թ. հունվարի 18-ին ավարտեց մարզիկի կարիերան:

2017 թվականի հունիսի 2-ին Ռոման Ամոյանը նշանակվեց սպորտի նախարարի խորհրդական: Պաշտոնը ստանձնելուն պես Ամոյանն անցել է գործի, սակայն ոչ զուտ գրասենյակային: Օլիմպիական մեդալակիրը կրկին մարզադահլիճում է, միայն մեկ տարբերությամբ՝ ոչ մարզական հագուստով եւ ոչ գորգի վրա:

NEWS.am Sport-ի թղթակցի հետ հանդիպումն էլ կայացավ հունահռոմեական ըմբշամարտի Հայաստանի մեծահասակների եւ երիտասարդական հավաքականների համատեղ մարզումներից մեկի ընթացքում, հենց մարզադահլիճում:

Ռոման, արդեն շուրջ մեկ ամիս է ստանձնել ես սպորտի նախարարի խորհրդականի պաշտոնը: Ճիշտ որոշո՞ւմ էր: Գուցե դու ավելի օգտակար լինեիր մարզիչի դերում:

Ուզում եմ նշել, որ սպորտից ես չեմ հեռացել՝ այս պաշտոնը ստանձնելով: Սպորտ, ըմբշամարտը, գորգն իմ կյանքն է: Իմ առաջին քայլերը սպորտում հենց գորգից են սկսվել: Ես միշտ կապված եմ եղել սպորտին եւ այդպես շարունակվելու է:

Աշխատանքս նախարարին ըմբշամարտի վերաբերյալ իմ խորհուրդներով օգտակար լինելն է: Աշխատանքս զուտ գրասենյակային չէ: Մշտապես լինում եմ մարզադահլիճներում, հետեւում եմ մեր հավաքականի մարզումներին, օգնում եմ մարզիչներին, փորձում եմ օգտակար լինել մեր թիմի տղաներին եւ երիտասարդներին գորգից դուրս, բայց գորգի կողքին: Այս ամենն իմ աշխատանքի անբաժան մասն է: Այս ընթացքում էլ մի քանի րոպե առաջ մարզադահլիճում էի եւ հետեւում էի մարզումներին: Հետեւում էի երիտասարդների մարզումներին, ովքեր հավաքականի ավագ մարզիչ Արմեն Բաբալարյանի գլխավորությամբ պատրաստվում են երիտասարդների Եվրոպայի առաջնությանը:

Ինչ վերաբերում է մեծահասակների հավաքականին, կարծում եմ՝ կկարողանամ օգտակար լինել մեր ուժեղ թիմին, ամեն ինչ կանեմ, որ ես էլ իմ լուման ունենամ նոր հաղթանակներ ձեռք բերելու մեջ: Հնարավորություններիս չափով կնպաստեմ հայկական սպորտի զարգացմանը: Հուսով եմ, կարդարացնեմ սպասելիքները:

Չե՞ս ափսոսում, որ ավարտեցիր մարզական կարիերադ:

Բնական է, որ ափսոսում եմ: Բայց սպորտում տարիքն իր դերն ունենում է եւ միշտ գալիս է այն ժամանակը, որ պետք է քո տեղը զիջես երիտասարդներին: Եթե ավելի երիտասարդ լինեի, կշարունակեի հանդես գալ գորգի վրա որպես մարզիկ: Բայց, ցավոք, այն տարիքում եմ, որ արդեն բավական է: Ամեն ինչ չափի մեջ է գեղեցիկ:

Կարոտո՞ւմ ես գորգը:

Շատ, անչափ… Նոր հետեւում էի մարզումներին, կարծում եմ՝ նկատելի էր, որ չէի կարողանում կողքից, առանց գորգ դուրս գալու հետեւել: Լինում են պահեր, որ ուզում եմ հագիս պաշտոնական հագուստը հանել, հագնել տրիկոն եւ անմիջապես գորգ դուրս գալ: Մի ամբողջ կյանք եմ անցկացրել ըմբշամարտի գորգի վրա՝ 7 տարեկանից: Երբեմն շատ եմ ուզում կրկին հետ գնալ տարիներ առաջ եւ նորից մարզվել: Բայց հիմա էլ ուրիշները պետք է մարզվեն, երիտասարդները աճեն ու նոր հաղթանակներ բերեն մեր երկրին: Ես էլ կլինեմ նրանց օգնականը, խորհրդականը:

Լուսինե Շահբազյան



© 2026 NEWS.am - Sport

The copyright for information published on this web site is owned exclusively by Armenian News-NEWS.am information-analytical agency. All information materials published on this website are intended solely for personal use. For full or partial reproduction of any material in other media it is required to acquire written permission from Armenian News-NEWS.am information-analytical agency. Those, who have committed copyright violations, will be prosecuted accordingly.