Լեւոն Ջուլֆալակյան. Արսեն Ջուլֆալակյանը մրցումների չի մասնակցում իմ որոշումով, Միհրան Հարությունյանը դեռ ապաքինվում է

21:50   19 հունիսի, 2017

Լոդնոնի Օլիմպիական խաղերի փոխչմեպիոն Արսեն Ջուլֆալակյանը մրցաշարերին, Եվրոպայի, աշխարհի առաջնությանը չի մասնակցում Լեւոն Ջուլֆալակյանի որոշմամբ:

Այս մասին լրագրողների հետ զրույցում ասաց օլիմպիական չեմպիոն, հունահռոմեական ըմբշամարտի Հայաստանի հավաքականի գլխավոր մարզիչ Լեւոն Ջուլֆալակյանը:

Ըմբշամարտի Հայաստանի հավաքականները սկսում են օգոստոսին Ֆրանսիայում կայանալիք աշխարհի առաջնության նախապատրաստման փուլը: Թբիլիսիի միջազգային մրցաշարում հունահռոմեական ոճի ըմշամարտի 75 կգ քաշայինների պայքարում ոսկե մեդալակիր դարձավ Կարապետ Չալյանը: Այս քաշային կարգում է հանդես գալիս նաեւ Արսեն Ջուլֆալակյանը:

Լեւոն Ջուլֆալակյանը հայտարարեց, որ ինքը թույլ չի տալիս իր որդուն մասնակցել մրցումների.

«Ես եմ նրան արգելում այս շրջանում մասնակցել մրցաշարերի փոփոխված օրենքներով. լուրջ ըմբիշների համար այս օրենքներով գոտեմարտելը շատ վատ է ու վնաս: Մեր ըմբշամարտը դարձրել են սումո: Փչացրել են: Ինձ համար սա անընդունելի է: Իսկապես, անհեթեթություն է նման օրենքներով գոտեմարտ անցկացնելը:  Աշխարհի առաջնությանը Արսեն Ջուլֆալակյանը չի մասնակցելու: Արսեն Ջուլֆալակյանը շատ լավ մարզվում է, ես ինքս եմ հետեւում նրա մարզումներին: Մենք կսպասենք մինչեւ 2018 թվականի հունվարի 1-ը, քանի որ նորից նախկին բարի օրենքները, չորեքթաթ դրությունը կվերադառնան»,- ասաց Լեւոն Ջուլֆալակյանը:

Անդրադառնալով Ռիոյի օլիմպիական փոխչեմպիոն Միհրան Հարությունյանի վերադառնալուն՝ մարզիչը նշեց.

«Միհրան Հարությունյանը բարձրակարգ ըմբիշ է, հավաքականի լիարժեք անդամ է: Եթե նա իրոք լիարժեք ապաքինվի, հավաքականի դռները բաց են նրա առաջ: Նա ոչ մի խախտում չի արել, պետք է մրցումների մասնակցի, հետագայում արդեն նրա ցույց տված արդյունքների շնորհիվ կորոշվի՝ նա կշարունակի հանդես գալ հավաքականում, թե ոչ:

Այս շրջանում Միհրան Հարությունյանը դեռեւս ապաքինվում է: Ունի նաեւ ուսի վնասվածք: Մարզիկի ճակատագրի հետ խաղ անել չենք կարող, կսպասենք նրա լիարժեք ապաքինվելուն»:

Լուսինե Շահբազյան



© 2024 NEWS.am - Sport

Սույն կայքում տեղ գտած լրատվական հրապարակումների հեղինակային իրավունքը պատկանում է բացառապես NEWS.am լրատվական-վերլուծական գործակալությանը։Սույն կայքի բոլոր լրատվական հրապարակումները անհատական օգտագործման համար են։ Տեղեկատվություն տարածող այլ միջոցներում սույն կայքի հրապարակումների (մասնակի կամ ամբողջական) վերահրապարկման համար անհրաժեշտ է NEWS.am լրատվական-վերլուծական գործակալության գրավոր թույլտվությունը։Խախտում թույլ տված անձինք կենթարկվեն պատասխանատվության օրենքով սահմանված կարգով։