Արայիկ Բաղդադյան. Արմեն Մկրտչյանը նոր շունչ տվեց թիմին, այժմ ղեկը հանձնում ենք Հապետնակ Կուրղինյանին

16:27   19 հունիսի, 2017

Ըմբշամարտի ֆեդերացիայի գլխավոր քարտուղար Արայիկ Բաղդադյանը չէր ցանկանա կրկին գլխավորել ազատ ոճի ըմբշամարտի Հայաստանի հավաքականը Արմեն Մկրտչյանի հեռանալուց հետո: Այդ մասին լրագրողների հետ հանդիպմանն ասաց Արայիկ Բաղդադյանը, որին փոխարինել էր Արմեն Մկրտչյանը հավաքականի մարզիչի պաշտոնում:

«Ես արդեն պաշտոն զբաղեցնում եմ: Ըստ պահանջի եմ հեռացել հավաքականի գլխավոր մարզիչի պաշտոնից: Երբ իմացա, որ Արմեն Մկրտչյանը ընդունել է Գագիկ Ծառուկյանի հրավերը, հենց նույն օրը հրաժարականիս դիմումը ներկայացրի: Մենք լավ աշխատանք ենք ունեցել թիմի հետ, միայն վերջում անհաջողությունն էին լինում, արդյունքներն էին պակասում:

Արմեն Մկրտչյանը նոր շունչ տվեց թիմին, շատ լավ աշխատանք եղավ այս կարճ ժամանակահատվածում: Այժմ ղեկը հանձնում ենք Հապետնակ Կուրղինյանին: Նա միշտ եղել է հավաքականում, նա պատրաստված մարզիչ է եւ կարող է թիմին նախապատրաստել աշխարհի առաջնությանը: Նրան կօգնի երկրորդ մարզիչ Էդգար Ենոքյանը, ով Արմեն Մկրտչյանի հետ սկսել էր մարզչական աշխատանքը հավաքականում եւ օգնում էր գլխավոր մարզիչին: Մենք բոլորս հետեւողական կլինենք հավաքականի աշխատանքին, կօգնենք թիմին եւ մարզիչներին»,- ասաց Արայիկ Բաղդադյանը:

Անդրադառնալով 2013 թվականի աշխարհի չեմպիոն Դավիթ Սաֆարյանի հավաքական վերադառնալուն, Արայիկ Բաղդադյանի նշեց.

«Դավիթ Սաֆարյանը երկու ամիս է, ինչ սկսել է մարզումները: Աշխարհի առաջնությանը երեւի չի հասցնի համապատասխան մարզավիճակ ձեռք բերել: Դեռ վերջնական պարզ չէ, նա կմասնակցի առաջիկա մրցաշարերին, թե ոչ: Մինչեւ հոկտեմբեր Դավիթ Սաֆարյանը որոշում կկայացնի՝ շարունակում է մնալ սպորտում, թե ավարտում է մարզական կարիերան»:

Լուսինե Շահբազյան



© 2022 NEWS.am - Sport

Սույն կայքում տեղ գտած լրատվական հրապարակումների հեղինակային իրավունքը պատկանում է բացառապես NEWS.am լրատվական-վերլուծական գործակալությանը։Սույն կայքի բոլոր լրատվական հրապարակումները անհատական օգտագործման համար են։ Տեղեկատվություն տարածող այլ միջոցներում սույն կայքի հրապարակումների (մասնակի կամ ամբողջական) վերահրապարկման համար անհրաժեշտ է NEWS.am լրատվական-վերլուծական գործակալության գրավոր թույլտվությունը։Խախտում թույլ տված անձինք կենթարկվեն պատասխանատվության օրենքով սահմանված կարգով։