Դավիթ Յուրչենկոյի փոխարեն հավաքական հրավիրվեց Արամ Հայրապետյանը
20:55 31 մայիսի, 2017Մախաչկալայի «Անժիի» դարպասապահ Դավիթ Յուրչենկոյի փոխարեն Հայաստանի ազգային հավաքական է հրավիրվել «Բանանցի» դարպասապահ Արամ Հայրապետյանը, հաղորդում է Հայաստանի ֆուտբոլի ֆեդերացիայի մամուլի ծառայությունը:
«Մեր ներկայացուցիչը երկու անգամ հանդիպել է նրա հետ, իսկ նա ասում է, թե ոչ մեկ չի զրուցել իր հետ: Հիմա էլ եմ հայտարարում, գրկաբաց սպասում եմ նրան: Եթե Յուրչենկոն ցանկանում է խաղալ հավաքականում, մի մոռացեք, որ մենք ունեցել ենք փայլուն դարպասապահ՝ Ռոման Բերեզովսկի, որը երբեք չի վախեցել լեգեոնական դառնալուց: Նույնը՝ Սարկիսովն ու Կորյանը: Նրանք սրտով ու հոգով հավաքականի հետ են: Արդեն խոսվել է, որ ԵՏՄ կազմի մեջ մտնող երկրների ֆուտբոլիստները լեգեոնական չեն համարվի, եւ Յուրչենկոն շատ լավ գիտի դա: Կա օրենք, որը գրված է: Բոլոր երկրները ստորագրել են դա: Այդ հարցը բարձրացրել եմ ես ու Բելառուսի ֆեդերացիայի նախագահը: Մուտկոն պատասխանել է, սակայն նրա ասածը օրենք չէ: Ոչ էլ իմ ասածն է օրենք: Լեգեոնական լինել չլինելը խնդիր չէ: Ցանկացողը գալիս է հավաքական:
Արսեն Բեգլարյանին ու Յուրչենկոյին չի կարելի համեմատել ֆուտբոլային որակների առումով: Գուցե հետագայում Բեգլարյանը կարող է լինել ավելի ուժեղ, կամ՝ ոչ: Յուրչենկոն հիմա մեզ շատ պետք է առաջիկա 3 ընտրական խաղերին: Եթե նա չգա, հետագայում ոչ ոք չի կարող ինձ արգելել նրան հեռու պահել հավաքականից: Հիմա նա շատ է պետք մեզ: Եթե նա չգա հիմա, հետո այլեւս պետք չէ: Այժմ ունենք արտասահմանում հանդես եկող լավ դարպասապահ, սակայն նա դեռ պատանի է»,- մայիսի 31-ին Երեւանում տեղի ունեցած ասուլիսում ասել էր ՀՖՖ նախագահ Ռուբեն Հայրապետյանը՝ մեկնաբանելով Յուրչենկոյի հետ կապված իրավիճակը:
Հունիսի 1-ին Հայաստանի հավաքականը Արթուր Պետրոսյանի գլխավորությամբ կսկսի մարզական հավաքը: Թիմը կպատրաստավի հունիսի 4-ին Երեւանում կայանալիք Հայաստան - Սենթ Քիթս եւ Նեւիս ընկերական խաղին եւ հունիսի 10-ին Պոդգորիցայում անցկացվելիք աշխարհի առաջնության ընտրական փուլի Չեռնոգորիա - Հայաստան հանդիպմանը:
© 2026 NEWS.am - Sport
The copyright for information published on this web site is owned exclusively by Armenian News-NEWS.am information-analytical agency. All information materials published on this website are intended solely for personal use. For full or partial reproduction of any material in other media it is required to acquire written permission from Armenian News-NEWS.am information-analytical agency. Those, who have committed copyright violations, will be prosecuted accordingly.