Հենրիխ Մխիթարյանն ամփոփել է Պրեմյեր լիգայում անցկացրած առաջին մրցաշրջանը

21:47   29 մայիսի, 2017

«Մանչեսթեր Յունայթեդի» եւ Հայաստանի հավաքականի կիսապաշտպան Հենրիխ Մխիթարյանն ամփոփել է Անգլիայի Պրեմյեր լիգայում անցկացրած առաջին մրցաշրջանը:

«Կարող եմ ասել, որ անցկացրեցի հաջող մրցաշրջան: Որոշակի խնդիրներ ունեի մրցաշրջանի սկզբում, բայց դա ֆուտբոլի մի մասն է: Ես ֆիզիկապես եւ հոգեբանորեն պատրաստ էի այդպիսի իրավիճակի: Կարողացա հաղթահարել դժվարությունները եւ ցուցադրել արդյունավետ ֆուտբոլ:

Պրեմյեր լիգան հեռուստացույցով եւ կյանքում տարբեր բաներ են: Այստեղ խաղի տեմպը շատ ավելի բարձր է, քան կարող ես պատկերացնել: Մտածելու ժամանակ քիչ ես ունենում: Դժվար էր հարմարվելը, բայց կարծում եմ՝ դա ինձ հաջողվեց»,- Մխիթարյանի խոսքը մեջբերում է Պրեմյեր լիգայի մամուլի ծառայությունը:

28-ամյա ֆուտբոլիստն Անգլիայի ավարտված առաջնության 24 խաղում խփել է 4 գոլ, կատարել 1 գոլային փոխանցում: Եվրոպայի լիգայի 11 հանդիպումներում Մխիթարյանը խփել է 6 գոլ: Նա նաեւ մասնակցել է Անգլիայի գավաթի խաղարկության 3 հանդիպման՝ խփելով 1 գոլ, կատարելով 1 գոլային փոխանցում: Անգլիական լիգայի գավաթի խաղարկությունում Մխիթարյանը 2 խաղում կատարել է 3 գոլային փոխանցում: Հայ ֆուտբոլիստը մասնակցել է նաեւ Անգլիայի Սուպերգավաթի խաղին:

Հիշեցնենք, որ «Մանչեսթեր Յունայթեդն» այս մրցաշրջանում դարձել է Եվրոպայի լիգայի գավաթակիր, Անգլիայի սուպերգավաթակիր եւ Անգլիական լիգայի գավաթակիր: Անգլիայի առաջնությունում թիմը գրավել է 6-րդ տեղը, սակայն Եվրոպայի լիգայում հաղթելու շնորհիվ հաջորդ մրցաշրջանում հանդես կգա Չեմպիոնների լիգայի խմբային մրցաշարում:



© 2024 NEWS.am - Sport

Սույն կայքում տեղ գտած լրատվական հրապարակումների հեղինակային իրավունքը պատկանում է բացառապես NEWS.am լրատվական-վերլուծական գործակալությանը։Սույն կայքի բոլոր լրատվական հրապարակումները անհատական օգտագործման համար են։ Տեղեկատվություն տարածող այլ միջոցներում սույն կայքի հրապարակումների (մասնակի կամ ամբողջական) վերահրապարկման համար անհրաժեշտ է NEWS.am լրատվական-վերլուծական գործակալության գրավոր թույլտվությունը։Խախտում թույլ տված անձինք կենթարկվեն պատասխանատվության օրենքով սահմանված կարգով։