Արմեն Մկրտչյանը՝ Սերբիայից. Մեր տղաներն ուժեղ են, ես էլ իմ խոսքի տերը եղա

00:16   5 մայիսի, 2017

Մեր տղաներն ուժեղ են, ես էլ իմ խոսքի տերը եղա՝ մեդալներ էի խոստացել եւ ստացվեց, ու դեռ վաղվա մեդալների ակնկալիք կա:

Այս մասին NEWS.am Sport-ի թղթակցի հետ զրույցում Սերբիայից ասաց ազատ ոճի ըմբշամարտի Հայաստանի հավաքականի գլխավոր մարզիչ Արմեն Մկրտչյանը: Նովի Սադում ընթացող առաջնությունում Հայաստանի համար բրոնզե մեդալներ են նվաճել Վոլոդյա Ֆրանգուլյանն ու Գրիգոր Գրիգորյանը:

«Ուրախ եմ, ամեն ինչ շատ լավ է: Իմ տղաներից գոհ եմ: Մարզիչներս եւ մարզիկները մեր առջեւ դրված առաջադրանքը կատարեցինք: Կարող էինք ավել անել, բայց բրոնզներն էլ վատ չի:

Վոլոդյա Ֆրանգուլյանի գոտեմարտը հրաշալի էր: 10:0 հաշիվը այն էր, ինչ նա պետք է աներ: Թուրքիայի մրցաշարում նա այս ըմբիշին տուշեով պարտվեց: Այստեղ նրանք կրկին հանդիպեցին, եւ Վոլոդյան պարտվելու կամ երկրորդ անգամ նույն սխալը թույլ տալու իրավունք չուներ. պատասխան մաքուր հաղթանակով՝ տուշեով հաղթեց:

Գրիգոր Գրիգորյանը լավ գոտեմարտեց: 9:3 հաշիվը եւս ինձ գոհացրեց: Բայց այս ամբողջ պայքարում՝ Գրիգորի պայքարում ես համարում եմ մեծ բացթողում կիսաեզրափակիչի գոտեմարտը, որում պարտությունը Գրիգորի մեղքով էր: Տակտիկական սխալը նրան պարտության բերեց, բայց Գրիգորյանը շատ լավ մարզավիճակում էր, պատրաստվել էր. ներքին խնդիր էր, որը նա ինքն իր վրա պետք է աշխատեր:

Գրիգորի եւ Վոլոդյայի մրցակիցներն իսկապես շատ ուժեղ էին եւ բոլոր մրցակիցներն էին ուժեղ: Սա Եվրոպայի առաջնությունն է եւ չի կարող թույլ ըմբիշ լինել: Բայց մենք էլ թույլ չենք, պատրաստվել ենք, երկար մարզումներ ունեցել, տանջվել, քրտնել: Արդյունքները պետք է լինեն: Ինձ այս պահին բրոնզները բավարարում են: Ավելին կարող էին լինել, բայց հիանալի է: Առաջին անգամ մեծահասակների մեջ շատ ուժեղ քաշում, շատ ուժեղ մրցակիցների մեջ 3-րդ պատվավոր տեղը հրաշալի արդյունք է: Դժվար, բայց հետաքրքիր, բարդ, լարված ու դիտարժան գոտեմարտերով հասանք այս մեդալներին:

Ես ինձ շատ լավ եմ զգում: Ինձ այստեղ բոլորը ճանաչում են, մոտենում, շնորհավորում են, ես էլ ինձ լավ եմ զգում, որովհետեւ արդյունքը ցույց տվեց մեր աշխատանքը:

Բայց չենք բավարարվի այսքանով: Դեռեւս երկու մասնակից ունենք: Կրկին տրամադրված ենք հաղթանակների, մեդալների: Հույս ունեմ, որ այսօրվա մեդալները կուրախացնեն եւ կոգեւորեն մեր վաղվա մասնակիցներին եւ նրանք էլ կհաղթեն»,- ասաց Արմեն Մկրտչյանը:

Եվրոպայի առաջնության վերջին օրը՝ մայիսի 5-ին, մեդալի համար կպայքարեն Հայաստանի վերջին 2 ներկայացուցիչները՝ Վալտեր Մարգարյանը (70 կգ) եւ Լեւան Բերիանիձեն (125 կգ):

Լուսինե Շահբազյան



© 2022 NEWS.am - Sport

Սույն կայքում տեղ գտած լրատվական հրապարակումների հեղինակային իրավունքը պատկանում է բացառապես NEWS.am լրատվական-վերլուծական գործակալությանը։Սույն կայքի բոլոր լրատվական հրապարակումները անհատական օգտագործման համար են։ Տեղեկատվություն տարածող այլ միջոցներում սույն կայքի հրապարակումների (մասնակի կամ ամբողջական) վերահրապարկման համար անհրաժեշտ է NEWS.am լրատվական-վերլուծական գործակալության գրավոր թույլտվությունը։Խախտում թույլ տված անձինք կենթարկվեն պատասխանատվության օրենքով սահմանված կարգով։