Մադրիդի «Աթլետիկոն» նվաճեց Չեմպիոնների լիգայի կիսաեզրափակիչի ուղեգիր, իսկ Մադրիդի «Ռեալն» ու Մյունխենի «Բավարիան» քառորդ եզրափակիչի պատասխան հանդիպումը շարունակում են լրացուցիչ ժամանակում: Հիմնական ժամանակն ավարտվեց 2:1 հաշվով գերմանական թիմի օգտին: Առաջին խաղում նույն հաշվով հաղթել էր «Ռեալը»:
Պատասխան խաղում Արքայական ակումբը գոլ բաց թողեց երկրորդ խաղակեսում: Սեփական տուգանային հրապարակում «Ռեալի» բրազիլացի պաշտպան Կազեմիրոն խախտեց կանոնները հոլանդացի կիսապաշտպան Արյեն Ռոբենի նկատմամբ եւ 11 մետրանոցը դիպուկ իրացրեց մյունխենցիների լեհ հարձակվող Ռոբերտ Լեւանդովսկին: Դրանից հետո հաշիվը հավասարեցրեց պորտուգալացի հարձակվող Կրիշտիանու Ռոնալդուն, որն օգտագործեց Կազեմիրոյի հրաշալի փոխանցումը:
Հենց հաջորդ գրոհի ժամանակ ինքնագոլի հեղինակ դարձավ «Ռեալի» ավագ Սերխիո Ռամոսը: Չեմպիոնների լիգայում 100-րդ հանդիպումն անցկացրած իսպանացի պաշտպանը պատահաբար հետ ուղարկեց գնդակը դարպասապահ Կեյլոր Նավասին, որը չէր սպասում եւ չհասցրեց գնդակի հետեւից:
84-րդ րոպեին երկրորդ դեղին քարտը ստացավ չիլիացի կիսապաշտպան Արտուրո Վիդալը՝ «Բավարիային» թողնելով 10 ֆուտբոլիստներով: Թիմերը պատրաստվում են լրացուցիչ ժամանակին:
Մադրիդի «Աթլետիկոն» Անգլիայում «Լեսթեր Սիթիի» դեմ պատասխան խաղում առաջինը հասավ հաջողության: Առաջին խաղակեսում աչքի ընկավ իսպանացի կիսապաշտպան Սաուլ Նյիգեսը՝ խփելով «Աթլետիկոյի» 100-րդ գոլը Չեմպիոնների լիգայում: Երկրորդ խաղակեսում Անգլիայի չեմպիոնները անգլիացի հարձակվող Ջեյմի Վարդիի գոլի շնորհիվ հավասարեցրին հաշիվը: «Աթլետիկոն» առաջին խաղում հաղթել էր 1:0 հաշվով եւ կիսաեզրափակիչում է:
Չեմպիոնների լիգա, քառորդ եզրափակիչ, պատասխան հանդիպում
«Ռեալ Մադրիդ» (Իսպանիա) - «Բավարիա» (Գերմանիա)՝ 1:2 (հիմնական ժամանակ), (առաջին խաղ՝ 2:1)
Կրիշտիանու Ռոնալդու, 76 - Ռոբերտ Լեւանդովսկի, 53, 11մ, Սերխիո Ռամոս, 78, ինքնագոլ
Հեռացում՝ Արտուրո Վիդալ («Բավարիա»), 84, երկրորդ դեղին քարտ
«Լեսթեր» (Անգլիա) - «Աթլետիկո Մադրիդ» (Իսպանիա)՝ 1:1 (առաջին խաղ՝ 0:1)
Ջեյմի Վարդի, 61 - Սաուլ Նյիգես, 26
Սույն կայքում տեղ գտած լրատվական հրապարակումների հեղինակային իրավունքը պատկանում է բացառապես NEWS.am լրատվական-վերլուծական գործակալությանը։Սույն կայքի բոլոր լրատվական հրապարակումները անհատական օգտագործման համար են։ Տեղեկատվություն տարածող այլ միջոցներում սույն կայքի հրապարակումների (մասնակի կամ ամբողջական) վերահրապարկման համար անհրաժեշտ է NEWS.am լրատվական-վերլուծական գործակալության գրավոր թույլտվությունը։Խախտում թույլ տված անձինք կենթարկվեն պատասխանատվության օրենքով սահմանված կարգով։