Հակոբ Սերոբյան. ՀԱՕԿ-ը խոստացել է օգնել 50 հազար եվրոյի նվեր մարզագույքի տեղափոխման եւ մաքսազերծման հարցում
00:15 5 մարտի, 201750 հազար եվրո արժողությամբ նոր մարզագույք ենք նվեր ստացել, բայց դեռեւս այն Հայաստան տեղափոխելու եւ տեղադրելու խնդիր ունենք: Եթե ինձ լսեն, ես թույլ չէի տա նոր ցատկահարթակը կիսաքանդ հատակին տեղադրել, մինչեւ չվերանորոգվի:
Այս մասին լրագրողների հետ զրույցում ասաց սպորտային մարմնամարզության Հայաստանի հավաքականի գլխավոր մարզիչ Հակոբ Սերոբյանը:
Հայաստանի մարմնամարզության ֆեդերացիան միջազգային ֆեդերացիայից նոր մարզագույք է նվեր ստացել՝ ցատկահարթակ, զուգափայտ, օղակներ, պտտաձող: Սակայն ցատկահարթակը տեղադրելու հետ կապված խնդիրներ կան:
«Ազատ վարժությունների մարզագույք ենք նվեր ստացել: Բավական մեծ արժեք ունեցող մարզագույք ենք ստանալու. մոտ 50 հազար եվրոյի: Փաստորեն, միջազգային ֆեդերացիայի նախագահն իր խոստումը պահեց, մեզ միայն մնում է մարզագույքը տեղափոխել Հայաստան: ՀԱՕԿ-ը խոսք է տվել մեզ օգնել, աջակցել՝ մաքսազերծման եւ տեղափոխման հարցում:
Ինչ վերաբերում է ցատկահարթակը տեղադրելու հարցին, դա խնդրի երկրորդ մասն է. Օրիգինալ մարզագույք է, բայց այս մարզադահլիճում հնարավոր չէ այն տեղադրել, մասնավորապես՝ ցատկահարթակը: Մարզադպրոցի հատակը թեք է, կիսաքանդ: Ափսոս է այդ լավ ցատկահարթակը այս հատակին դնենք: Հույս ունեմ, որ մեր մարզադպրոցը կվերանորոգվի, քանի որ ես ինքս թույլ չեմ տա, որ այս հատակի վրա այդ թանկարժեք ցատկահարթակը դրվի: Եթե այս՝ մաշված եւ կիսաքանդ փայտե ծածկույթով հատակին դնենք, կծառայի մոտ 2 տարի: Իսկ եթե հարթ հատակին լինի, 10 տարուց ավել այն մեզ կծառայի»,- մանրամասնեց Հակոբ Սերոբյանը:
Լուսինե Շահբազյան
© 2026 NEWS.am - Sport
The copyright for information published on this web site is owned exclusively by Armenian News-NEWS.am information-analytical agency. All information materials published on this website are intended solely for personal use. For full or partial reproduction of any material in other media it is required to acquire written permission from Armenian News-NEWS.am information-analytical agency. Those, who have committed copyright violations, will be prosecuted accordingly.